.webp){kind=icon}
Јапонското министерство за економија подготвува субвенции од вкупно 13 милијарди долари за да ги зголеми инвестициите во индустријата за чипови во обид да го врати статусот на голема полупроводничка сила.
Министерството за економија, трговија и индустрија бара над 12 милијарди долари во буџетот, покрај неискористените пари за субвенција за чипови. „Блумберг“ претходно објави дека Јапонија планира да одвои пари за зголемување на капацитетот за производство и складирање чипови во земјата.
Како дел од поширокиот план за заживување на економијата, Токио се обидува да привлече инвестиции во производството на најсовремени полупроводници, кои се клучни за идните технологии, од вештачка интелигенција до самоуправувачки автомобили. Тоа вклучува милијарди долари за поддршка за „Тајван семикондуктор“ (Taiwan Semiconductor Manufacturing Co), лидер во напредното производство на чипови, и за „Рапидус“ (Rapidus Corp.), локален стартап чија цел е да се натпреварува во производство на чипови од висока класа.
Bloomberg
Парите ќе бидат искористени за да се забрза способноста на Јапонија да дизајнира и произведува чипови од следната генерација и да обучува модели со вештачка интелигенција. Јапонија доделува средства за производители на компоненти од висока класа, опрема за чипови, индустриски гасови и производство на полупроводници, како и за обука на инженери.
„Глобалната економска безбедносна ситуација поврзана со полупроводниците станува сè потешка“, изјави официјален претставник на министерството за новинарите. „Добиваме голем интерес и од странски и од домашни компании што сакаат да инвестираат во Јапонија“.
Јапонија се обидува да ја врати лидерската позиција во индустријата по децении пад. Државата покрива речиси половина од трошоците за фабриката на ТСМЦ (TSMC) во Кумамото, додека разговара за поддршка за друга фабрика, и е подготвена да обезбеди околу 1,5 милијарда долари за финансирање на проширувањето на фабриката на „Микрон“ (Micron Technology Inc.) во Хирошима, а го финансира и обидот на „Рапидус“ да изгради свои најсовремени чипови од два нанометра во земјата.
„Рапидус“ вложува долгорочно во изградба на јапонска леарница за чипови, која може да се натпреварува со ТСМЦ и со „Самсунг“. Тецуро Хигаши, претседател на компанијата и ветеран во индустријата, рече дека компанијата поддржана од државата има цел да изгради најсовремена леарница до 2027 година, за да ја поттикне јапонската економија преку обезбедување стабилно снабдување.
