„Хуавеј технолоџис“ (Huawei Technologies Co.) денеска ја промовира својата најнова серија на паметни телефони, одржувајќи го замавот откако пробивот на неговиот уред „мејт 60“ (Mate 60) помогна да се намали доминацијата на „Епл“ (Apple Inc.) во сегментот од високата класа во Кина.
Серијата на паметни телефони „пјура 70“ (Pura 70) излегува на пазарот со почетна цена од 5.499 јуани (760 долари) и се зголемува до 9.999 јуани за таканареченото издание „ултра“, што одговара на цената на некои модели на „ајфон 15“ (iPhone 15). Уредот, кој беше промовиран преку објава на Вичет (WeChat), се најде на врвот на трендовските листи на социјалните медиуми кратко време по промоцијата. Моделот „ултра“ има камера што може да се повлече со приспособлива решетка - реткост кај телефоните за широка потрошувачка.
„Пјура“ го нагласува повторното оживување на „Хуавеј“, кој во 2023 година ја промовира серијата „мејт 60“, која поседуваа процесор за кој многумина мислеа дека е над можностите на кинеските производители на чипови. „Хуавеј“ не го прецизира процесорот на новиот телефон, но неколку онлајн рецензенти објавија видеа во кои покажуваат дека моделите од повисоко ниво имаат чип „кирин 9010“ (Kirin 9010). Тоа е продолжение на кинескиот „кирин 9000с“ (Kirin 9000s) во „мејт 60 про“ (Mate 60 Pro), прославен во Кина минатата година како доказ дека земјата може да ги надмине американските санкции.
Од неговото претставување во август, „мејт 60“ предизвика голем пад на продажбата на ајфони во Кина и му помогна на „Хуавеј“ да ги надмине своите домашни ривали.
Порано позната како серија „пи“ (P), линијата „пјура“ традиционално се продаваше поради силните можности на камерата. Давањето нова опција на домашните корисници може да изврши дополнителен притисок врз ајфонот, кој треба да се надгради до септември. За „Хуавеј“, тоа е уште еден чекор кон обнова на потрошувачкиот бизнис, кој некогаш беше мотор на раст на приходите.
.webp){kind=icon}
