Универзална Инвестициона Банка АД Скопје (УНИБанка) ќе изврши исплата на полугодишна камата по каматна стапка 9 отсто на годишно ниво на имателите на перпетуални обврзници, објави денеска банката преку Македонска берза.
Исплатата на камата ќе се изврши на 22.07.2022 година.
Право на исплата на камата имаат лицата кои се регистрирани во книгата на иматели на перпетуални обврзници во Централниот депозитар за хартии од вредност заклучно со 21.07.2022 година.
„Тргувањето со обврзниците во деновите 20 и 21 Јули 2022 година ќе се реализира со пресметана акумулирана камата за 180 и 181 денови соодветно, при што Купувачот при порамнувањето на 22 и 25 Јули ќе треба да му го уплати износот на чистата цена + акумулираната камата на Продавачот. При ова, Купувачите ќе бидат регистрирани во книгата на иматели на перпетуални обврзници во Централниот депозитар за хартии од вредност на 22 и 25 Јули 2022 година, соодветно и нема да остварат право на исплата на полугодишната камата, стои во објавата.
Првата емисија на перпетуални обврзници во Република Северна Македонија банката ја издаде во јануари 2019 година. Ова е прв финансиски инструмент од овој вид на македонскиот пазар на капитал.
Вкупната номинална вредност на емисијата изнесува 5 милиони евра. Обврзницата е без рок на доспевање, со фиксна каматната стапка од 9 отсто на годишно ниво за првите пет години. По завршување на овој период каматната стапка се зголемува на 11 отсто. Номиналната вредност на обврзницата изнесува 1.000 евра.
Перпетуалната обврзница е котирана и со истата може да се тргува на официјалниот пазар на Македонска берза.
