Нето-профитот на „Стелантис“ падна за 70 отсто поради слабата продажба

Четвртиот квартал во „Стелантис“ (Stellantis) повторно беше обележан со послаби резултати, додека од Крагуевац се извезуваат првите контингенти на новата „фиат панда“ (Fiat Panda). Конкретно за „панда“ немаше многу зборови во презентациите за инвеститорите, но беше наведена во подетално објаснување за падот од шест проценти во последниот квартал од 2024 година (на европскиот пазар). Имено, на повикот за инвеститори беше нагласено воведувањето нови модели во B-сегментот (за пополнување на празнините во тековната понуда) - „МХЕВ ситроен ц3“ (MHEV Citroën C3), „ситроен ц3 еркрос“ (Citroën C3 Aircross), „опел фронтера“ (Opel Frontera) и „фиат гранде панда“ (Fiat Grande Panda). Исто така, беше наведено дека првите европски модели од новата генерација на „Стелантис“ имаат ветувачки почеток на пазарот.

Консолидираните испораки паднаа за 12 проценти, поради пониско производство и проактивно чистење на резервите. Нето-приходите паднаа во поголема мера (во процентуална смисла), за 17 проценти. Со други зборови, „Стелантис“ изгуби и на ценовната моќ во овој квартал. Се формира претпоставка дека цените се намалени за поттикнување на продажбата, како и дека се продадени помалку производи со поголеми маржи (поскапи производи). Генерално гледано, побарувачката за автомобили, а особено за електрични автомобили, беше слаба во периодот зад нас, па падот на испораките е во согласност со очекувањата.

Чистењето на резервите беше скап потег за „Стелантис“, па индустрискиот слободен паричен тек падна дури за 117 проценти и изнесуваше негативни шест милијарди евра во четвртиот квартал од 2024 година. Задолженоста значително се зголеми, конкретно вкупниот долг се зголеми за 26,4 проценти на 31 декември 2024 година во споредба со 31 декември 2023 година.

Сервисирањето на долгот сериозно влијаеше на резултатот, со оглед на тоа што финансиските трошоци скокнаа за 721 процент во фискалната 2024 година во споредба со фискалната 2023 година. Со тоа, нето-резултатот падна за 70 проценти во истиот период, па така и заработката по акција (EPS). Во апсолутна смисла, заработката по акција падна од 5,94 евра на 1,84 евро.

По објавувањето на резултатите, акцијата падна за 4,7 проценти. Пред нешто повеќе од една година акцијата се тргуваше на својот максимум од 27,1 евра по парче (25 март 2024 година). „Стелантис“ тогаш сè уште пловеше на бран на солидна профитабилност, која во голема мера беше поддржана од високите цени на производите. Оттогаш акцијата изгуби повеќе од половина од својата вредност и на 26 февруари се тргува по 12,86 евра.

Bloomberg Adria

 

Изгледи за иднината

За „Стелантис“ работите ќе се влошат пред да можат да тргнат на подобро. Во „Стелантис“ ги модифицираа своите очекувања и прогнозираат позитивен раст на приходите во 2025 година, средна едноцифрена маржа (на тековните нивоа од 5,5 проценти, значително помалку од 12,8 проценти во 2023 година) и позитивен индустриски слободен паричен тек.

Долгорочните прогнози е неблагодарно да се изложуваат, бидејќи сега во голема мера зависат од потрошувачките обрасци, но веруваме дека тековните очекувања на „Стелантис“ се амбициозни. Главната задршка ни ја даваат разнишаната кеш-позиција и растечката задолженост. Сега решението на равенката лежи во реакцијата на пазарот на новите модели и нивните долгорочни перформанси, со оглед на тоа што „Стелантис“ веќе стекна репутација на нестабилен квалитет и доверливост, особено во Северна Америка.

За обновување на конкурентноста, „Стелантис“ има три главни приоритети - понатамошно намалување на резервите, пополнување на празнините во понудата и пристапност на возилата.

Напредокот во оптимизирањето на резервите е јасен, со оглед на тоа што на 31 декември 2024 година се намалија за 18,4 проценти во споредба со 31 декември 2023 година (околу 268 илјади единици, во апсолутна смисла). „Стелантис“ во 2024 година воведе дваесет нови модели, што му успеа на „Рено“ (Renault), кој успеа да продаде повеќе поскапи нови модели.

„Стелантис“ засега не успева во тоа, со оглед на падот на ценовната моќ. Резултатите на „Стелантис“ сега зависат од страната на побарувачката (потрошувачкиот интерес за новите модели), со оглед на тоа што се во расчекор во однос на понудата. Пристапноста на возилата е исто така во фокусот, имајќи предвид дека „Стелантис“ ја засити сопствената потрошувачка база со раст на цените за одржување на краткорочната профитабилност за време на 2023 и почетокот на 2024 година.

Во моментов нема коментари за веста. Биди прв да коментира...

Остави коментар