„Стелантис“ ги менува плановите за Јужна Америка под притисок на кинеската конкуренција

„Стелантис“ (Stellantis NV) ја преиспитува технолошката стратегија што ја постави за Јужна Америка пред три години, бидејќи компанијата губи терен од кинеските конкуренти, принудена да ги прилагоди своите планови за електрификација, изјави висок извршен директор во регионот.

„Пазарот се промени, знаеме дека се промени и мора да бидеме конкурентни“, изјави главниот оперативен директор за Јужна Америка, Херландер Зола, во разговор со новинари во Сао Паоло.

Овој потег доаѓа откако „Стелантис“ виде како еден од нејзините „дијаманти во круната“ во регионот, Џип (Jeep), ги губи потрошувачите поради кинеските производители на автомобили кои нудат нова технологија во истиот ценовен опсег. Сега „Стелантис“ ги оценува алтернативите за електрификација за да ги врати возачите, вклучително и верзија со т.н. flex-fuel технологија за проширување на опсегот на возење, од партнерот „Липмотор“ (Leapmotor), која компанијата веќе почна да ја развива за регионот, рече тој. Автомобилскиот производител, исто така, ги држи отворени и другите опции, вклучително и возила напојувани исклучиво со етанол од шеќерна трска, во зависност од потенцијалните владини стимулации, рече Зола.

„Стелантис“ очекува да го претстави својот ревидиран поглед на технолошката развојна мапа на регионот подоцна оваа година. „Планот не се промени, но потребни се адаптации, прилагодувања“, рече тој, додавајќи дека брзината на промената на пазарот ја принудува компанијата да се движи брзо.

Итноста е особено изразена  на пазари како што се Бразил и Уругвај. Зола рече дека Џип изгубил место во Бразил откако не успеал доволно брзо да ја обнови својата понуда на производи и технологија, додека кинеските производители на автомобили се ширеа. „Стелантис“, исто така, го предаде пазарниот удел во Уругвај, бидејќи електрифицираните возила се зголемија од околу 2 отсто на 30 отсто од пазарот за една година. Различната брзина на усвојување значи дека „Стелантис“ ќе има потреба од различни решенија низ Јужна Америка, вклучувајќи електрични и хибридни опции, рече тој.

 

Fenabrave

 

„Џип е можеби еден од брендовите што најмногу страда од кинеската офанзива и усвојувањето на нови технологии во ценовниот опсег каде што се нуди Џип, затоа треба да одговориме“, рече Зола, додавајќи дека лансирањето на малиот теренец „Авенџер“ (Avenger) е првиот чекор. „Не се сомневам дека Авенџер е моќно оружје за нас да ја вратиме позицијата во сегментот каде што губевме пазарен удел и сигурен сум дека ќе почнеме да се опоравуваме.“

„Стелантис“ е мултинационална компанија формирана во 2021 година со спојување на француската „ПСА Групација“ и италијанско-американската „Фиат Крајслер Автомобили“. Компанијата има 14 брендови под својата капа, вработува околу 300 илјади луѓе во триесетина земји, и присутна е на преку 130 пазари глобално. 

-Со помош на Џована Серафим