Колкави се приносите за комерцијалните недвижности во регионот

Најновите податоци за приносите од канцелариски, индустриски и трговски недвижности во Централноисточна Европа покажуваат јасна поделба меѓу позрелите и помалку развиените пазари. Инвеститорите во Чешка, Полска и Словачка се подготвени да прифатат пониски стапки на поврат, додека пазарите како Хрватска, Романија, Србија и Бугарија сè уште нудат повисоки приноси поради поголемите ризици и ограничената ликвидност.

Канцеларискиот сектор во регионот бележи стабилни, но различни приноси (од пет до седум и пол проценти). Прага и Варшава се предводници со најниски нивоа, поттикнати од силни економии, висока побарувачка и присуство на меѓународни закупци. Во Белград, Букурешт и Загреб приносите се повисоки, бидејќи пазарите остануваат помали и помалку ликвидни. Хрватска и Словачка имаат корист од стабилноста на еврозоната, додека пазарите надвор од ЕУ носат премија за валутен и регулаторен ризик. Во Загреб, на пример, ограничената понуда на модерни канцелариски простори и континуираната побарувачка ги поттикнуваат инвеститорите кон пониски приноси.

Индустриските и логистичките недвижности се издвојуваат како најсигурен и најперспективен сегмент на пазарот. Во Чешка и во Словачка приносите се движат од пет до шест проценти, што ги одразува високата побарувачка и развиената инфраструктура. Полска и Унгарија бележат умерени стапки (6,5–6,75 oтсто), додека Србија, Романија и Бугарија нудат и до осум проценти, бидејќи инвеститорите бараат поголем поврат за преземениот ризик. Побарувачката за складишни простори е поттикната од ширењето на е-трговијата и процесот на приближување на производството (nearshoring), што го прави индустрискиот сектор долгорочно атрактивен.

Трговските центри остануваат најпредизвикувачкиот сегмент на пазарот. Структурниот пад на физичката малопродажба и растот на онлајн трговијата го зголемија ризикот на работење во овој сектор, што се одразува во повисоки приноси. Во Прага и во Варшава приносите се движат меѓу 5,75 и 6,5 проценти, додека во Белград, Софија и Букурешт достигнуваат меѓу седум и осум проценти. Хрватска бележи нешто пониски стапки, околу седум проценти, благодарение на силната туристичка потрошувачка и ограничената понуда на модерни трговски центри со сигурни закупци.

Во целина, разликите во приносите јасно ги следат нивоата на макроекономската стабилност, зрелоста на пазарот и перцепцијата на ризикот. Стабилните пазари со развиена инфраструктура и пристап до еврозоната остваруваат пониски приноси, додека помалите и помалку ликвидни пазари нудат повисок поврат за инвеститорите. Логистиката останува најпривлечниот сектор во регионот, додека малопродажбата се соочува со предизвиците на дигитализацијата. Како што инфлацијата се смирува и трошоците за финансирање се намалуваат, се очекува приносите во регионот да продолжат да се приближуваат кон нивото на Западна Европа.