Комерцијална банка ќе распредели дивиденда во висина од над 18,5 милиони евра за 2022 година. Во согласност со предлог-одлуките што се доставени во пресрет на годишното собрание на банката, закажано за 29 март, акционерите што поседуваат обични акции ќе добијат 500 денари по акција на бруто-основа, или 50 отсто од поединечната номинална вредност на акциите.
Комерцијална банка во 2022 година оствари добивка пред оданочување во висина од 37,5 милиони евра. По одбивањето на данокот на добивка (2,6 милиони евра), добивката по оданочување изнесува 34,9 милиони евра (2.149.186.831 денар).
„За распределба се предлага износот на нераспределена добивка од 2.149.186.831 денар, и тоа на дел за дивиденда за обични акции, дел за резерви и дел за задржана добивка за инвестициски вложувања (реинвестирана добивка) што банката ќе ја користи во 2023 година“, стои во предлог-одлуките.
За резерви банката ќе издвои 13,8 милиони евра.
„Најголемиот дел од овој износ е заради потребата банката да се усогласи со Одлуката за висината на стапката на противцикличниот заштитен слој на капиталот за изложености во Република Северна Македонија и за изложености кон други земји и Одлуката за висината на стапката на противцикличниот заштитен слој на капиталот за изложености во Република Северна Македонија и за изложености кон други земји, донесени од страна на НБРСМ заради воведување противцикличен заштитен слој на капиталот од 0,5 проценти за изложености во Македонија, заклучно со август 2023 година“, стои во предлог-одлуката.
Околу 2,6 милиони евра од добивката се распределуваат во задржана добивка за инвестициски вложувања (реинвестирана добивка), која служи за развојни цели на банката.
.webp){kind=icon}
