.webp){kind=icon}
„Амазон“ (Amazon.com) објави приходи и профит што ги надминаа процените на аналитичарите, поттикнати од растот на продажбата во малопродажната единица и од значителното намалување на трошоците.
Растот на продажбата во единицата за компјутери во облак е помал од прогнозите, а извршниот директор Енди Џеси ги увери инвеститорите на конференциска повик дека бизнисот е стабилизиран и објави дека компанијата затворила серија зделки што стапиле во сила на почетокот на тековниот квартал. По неговите коментари, акциите во продолженото тргување пораснаа за околу 3,5 отсто.
Џеси оваа година го освојува „Волстрит“ со длабоки намалувања на трошоците и со фокусирање на зголемување на профитот. Под негово раководство, компанијата со седиште во Сиетл стана повеќе зависна од услуги што имаат тенденција да заработат повеќе пари отколку нејзиниот оригинален бизнис со продажба на стоки преку интернет, вклучувајќи рекламирање, логистички услуги за независни трговци на мало и давање компјутерска моќ на корпорации.
„Минатогодишното забавување на малопродажниот гигант се чини дека е во ретровизор, бидејќи започна со значително намалување на трошоците оваа година и го заостри својот фокус на клучните области на раст, како што се неговиот онлајн пазар со висока маржа и услугите што може да им ги продава на тие трговци“, рече Зак Стамбор, аналитичар во „Инсајдер интелиџенс“.
Енди Џеси/Blooomberg
Продажбата на нејзината единица за облак „Амазон веб сервис“ (Amazon Web Services) се зголеми за 12 отсто, на 23,1 милијарди долари. Оперативните приходи од 6,98 милијарди долари беа околу 1,3 милијарда долари повисоки од очекувањата на аналитичарите.
Главниот финансиски директор Брајан Олсавски избегна да посочи дека растот на „Амазон веб сервис“ паднал, објаснувајќи дека единицата се бори со голем број различни фактори. Но тоа може да биде знак дека повлекувањето на корпоративното трошење на услугите во облак сè уште не е завршено, што потенцијално може да ги загрижи инвеститорите.
Резултатите исто така ги потврдија напорите на Џеси за намалување на трошоците, што ги намали трошоците во целата компанија. Трошоците за продажба и за маркетинг на „Амазон“ паднаа за првпат од 2015 година. Растот на трошоците за технологија и инфраструктура, категорија што ги вклучува платите за софтверските инженери и трошоците за серверите на „Амазон“, порасна само за 8,8 отсто, околу една четвртина од стапката од пред една година.
Приходите во третиот квартал се зголемија за 13 отсто, на 143,1 милијарди долари, објави „Амазон“ во четвртокот. Според податоците на „Блумберг“, аналитичарите во просек процениле приходи на 141,6 милијарди долари. Оперативните приходи се зголемија на 11,2 милијарди долари, во споредба со 2,5 милијарди долари во периодот од пред една година. Аналитичарите во просек процениле 7,71 милијарди долари.
И онлајн продавниците на компанијата се претставија подобро од очекуваното. Единицата генерираше 57,3 милијарди долари, што е зголемување од седум отсто во однос на периодот од претходната година. Во кварталот беше вклучен „Прајм деј“ (Prime Day), специјалната промоција на „Амазон“ во средината на летото. Продажбата на реклами скокна за 26 отсто, на 12 милијарди долари, што исто така ги надмина процените.
„Амазон“ предвидуваше продажба од 160 до 167 милијарди долари во кварталот што завршува во декември, во споредба со просечната процена на аналитичарите од 166,6 милијарди долари, според податоците на „Блумберг“. Оперативните приходи во тој период ќе бидат од 7 до 11 милијарди долари. Аналитичарите во просек предвидуваа 8,71 милијарди долари.
Олсавски рече дека потрошувачот „троши пари, но претпазливо и воден од понудата“. Акциите на „Амазон“ затворија на 119,57 долари во Њујорк, што е раст од 43 отсто оваа година.
