„Сантандер“ го стопира финансирањето за „Гунвор“ по обвиненија за врски со Кремљ

Шпанската банка „Сантандер“ (Banco Santander SA) ги повлече обврските за финансирање на „Гунвор“ (Gunvor Group) откако американското Министерство за финансии го нарече трговецот со суровини „марионета на Кремљ“,  велат анонимни извори запознаени со ситуацијата.

Иако „Сантандер“ е само една од десетиците банки што го финансираат „Гунвор“, а другите кредитори и понатаму ја даваат својата поддршка, ова е првиот знак за негативни последици за трговската куќа по коментарите на САД што минатата недела ги шокираа енергетските пазари.

САД не дадоа дополнителни појаснувања за објавата, која „Гунвор“ ја оцени како „фундаментално погрешна и неточна“. Таа следуваше како реакција на планот на „Гунвор“ да ги купи меѓународните средства на санкционираниот руски нафтен гигант „Лукоил“ (Lukoil PJSC) – договор што Вашингтон рече дека ќе го блокира, по што „Гунвор“ се повлече.

Трговците со суровини како „Гунвор“, кој е меѓу најголемите светски трговци со нафта и гас, многу зависат од кредитните линии од банките за да ги финансираат милијардите долари вредни ресурси со кои тргуваат секој ден.

Минатата недела беше објавено дека „Сантандер“ е една од 24-те банки што обезбедуваат 2,8 милијарди долари финансирање за американската подружница на „Гунвор“. Но, според соговорниците, банката потоа се повлекла од групата кредитори.

Шпанската банка исто така требаше да учествува во европски револвинг кредит од 2,4 милијарди долари објавен следниот ден, но се повлекла пред финализирањето на договорот, велат истите лица.

Портпаролот на „Гунвор“ рече дека „Сантандер“ уште на 31 октомври ја најавил својата одлука да се повлече од финансирањето, во момент кога документацијата за договорите била во завршна фаза. Тоа се случило уште пред објавата на американското Министерство за финансии на платформата Х, а било реакција на најавата дека „Гунвор“ можеби ќе ги купи меѓународните средства на „Лукоил“, додаде портпаролот.

Сепак, на 6 ноември „Гунвор“ објави соопштение во кое наведува дека „со задоволство го поздравува“ вклучувањето на „Сантандер“ во синдикатот на банки како дел од американската кредитна линија – соопштение што било објавено неколку часа пред објавата од Министерството за финансии. Потоа, „Сантандер“ повторно се повлекол, велат соговорниците.

„Сите други банки во двете финансирања беа информирани за одлуката на ‘Сантандер’ и сите повторно го потврдија своето учество“, изјави портпаролот на „Гунвор“. „Ниедна друга банка не побарала да се повлече од некое финансирање или да ги намали постојните кредитни линии.“

Портпаролот на „Сантандер“ одби да коментира.

Иако е една од најголемите европски банки, „Сантандер“ има релативно мала улога во финансирањето на трговците со суровини – сектор во кој доминираат ИНГ (ING Groep NV), „Рабобанк“ (Cooperatieve Rabobank UA) и „Сосиете женерал“ (Societe Generale SA). 

Другите банки на „Гунвор“ и понатаму се генерално поддржувачки настроени кон трговската куќа и избегнуваат брзи реакции, велат анонимните извори, но внимателно следат дали ќе има нови изјави од САД. Трговецот имал 26 милијарди долари достапни кредитни линии од повеќе од 50 банки на крајот на минатата година, покажуваат податоците во годишниот извештај.

„Гунвор“ се обидува активно да ги увери кредиторите по објавата на американското Министерство за финансии. На 7 ноември, ден по објавата, компанијата одржала конференциски повик со банките, на кој раководството нагласило дека била транспарентна во однос на сопственичката структура и дека во последните години ги зајакнала процедурите за усогласеност.

Трговската куќа долго време е под лупа поради врските со Русија. Нејзиниот коосновач Генадиј Тимченко е близок со рускиот претседател Владимир Путин, а кога САД му воведоа санкции во 2014 година, тврдеа дека Путин има инвестиции во „Гунвор“. Компанијата го негираше тоа тврдење, за кое не беа презентирани докази, а извршниот директор Торбјорн Торнквист ја откупи сопственичката квота на својот руски партнер.

„Во согласност со нашата репутација за транспарентност, во последните две недели ‘Гунвор’ беше во редовен контакт со нашите банки и одржа низа билатерални и мултибанкарски повици“, додаде портпаролот на компанијата.