text size
Инвестиција вредна 20 милиони евра, која треба да отвори 120 работни места, вака денеска е најавен новиот производствен капацитет на турската високотехнолошка компанија „Текнопанел“, која веќе се гради во ТИРЗ Скопје 1. Договорот за инвестицијата го потпишаа премиерот Димитар Ковачевски, директорот на Дирекцијата на ТИРЗ, Јован Деспотовски, и сопственикот и член на Управниот одбор на „Текнопанел“, Орхан Кахвеџи.
Како што беше речено, во новиот капацитет, со површина од 16.000 квадратни метри, сместен на плац со површина од 55.000 квадратни метри во ТИРЗ Скопје 1, ќе се произведуваат најсовремени сендвич-панели.
Ова е прв капацитет на компанијата надвор од Турција и, според инвестицискиот план, се очекува вкупниот извоз за десет години да надмине 170 милиони евра.
„Денес е важен ден зашто влегува нова инвестиција и ова не е случајно. Како Влада, овозможивме предности за инвестирање. Членка сме на НАТО, со почнати преговори за членство во ЕУ и затоа сме стабилен партнер за странските инвеститори“, истакна Ковачевски пред потпишувањето на договорот.
МИА
Според него, производството во новиот капацитет на „Текнопанел“ ќе почне идната година, а просечната нето-плата ќе биде 600 евра.
„Во согласност со инвестицискиот план, предвиден е континуиран раст на платите. ’Текнопанел’ во ТИРЗ ќе произведува иновативни покривни панели, кои истовремено нудат топлинска, хидро и звучна изолација, а се отпорни и на пожар. Сето ова значи нов стимул за домашната економија и зголемување на извозот од земјава. Групацијата има 460 вработени и е една од водечките компании во Европа, со напредно технолошко производство и извоз во 102 земји во светот. Оттука, во Скопје ќе се снабдува европскиот пазар и во следните девет години се очекува извозот да достигне над 170,5 милиони евра“, рече Ковачевски.
Во првите десет месеци од годинава во компаниите во ТИРЗ, како што посочи тој, се отворени над 2.000 нови работни места, а бројот на вработени за првпат се искачи над 16.000.
„Во моментов, ТИРЗ има помеѓу 30 и 35 активни клиенти. Во фаза на изградба се пет фабрики што имаат потпишано договори со Владата. Некои од најновите инвеститори веќе имаат економски активности, а во следните два месеца до крајот на годината ќе презентираме уште четири нови инвестиции“, најави премиерот.
Директорот на Дирекцијата на ТИРЗ, Јован Деспотовски, оцени дека „Текнопанел“ нема да застане на овие 20 милиони евра и дека во наредните месеци ќе почнат разговори за проширување на инвестицијата.
„Инвестицијата произлезе од скромниот разговор што го имавме минатиот јули со Орхан Кахвеџи, во неговата канцеларија во Истанбул. Од таквиот скромен разговор стигнавме до нешто што веќе се случува во ТИРЗ Скопје 1“, рече Деспотовски.
Тој нагласи дека во изминатите 18 месеци во технолошко-индустриските развојни зони има инвестиции од 620 милиони евра, со кои се планира отворање на нови 5.000 работни места.
МИА
Сопственикот и член на Управниот одбор на „Текнопанел“ порача дека инвестицијата во ТИРЗ Скопје ќе се одвива во четири етапи.
„Нашиот петти објект во Скопје ќе биде со најсовремени технологии, ќе произведува 350.000 кубни метри продукти што ќе се извезуваат низ цела Европа и ќе има годишен извоз од 35 милиони евра. Ќе биде лидер марка во македонската индустрија“, рече Кахвеџи.
Тој нагласи дека имаат и ќе имаат индустриска и јавна соработка со многу фирми во земјава.
МИА
Турскиот амбасадор Хасан Мехмед Секизкок рече дека турските компании многу инвестираат во земјава и додаде дека од денеска, со доаѓањето на „Текнопанел“, ќе се поттикне нова вредност во македонската економија.
„Соработката ќе даде голем плод. Турција е пријателска и братска земја со вас. Како и досега, и отсега ќе се стремиме да продолжат нашите инвестиции и да ја поддржиме македонската економија. Идниот месец ќе се одржи состанок на Мешаната економска комисија, на кој ќе се разгледуваат можностите за економски развој и соработка“, рече Секизкок.
„Текнопанел“ е еден од најголемите извозници во Турција и на листата од 500 водечки индустриски компании во земјата. Во Турција има четири фабрики, во Мерсин, Измир, Сакарија и Истанбул.
.webp){kind=icon}
