Извршниот директор на „Тесла“, Илон Маск, изјави дека почнал да ги зголемува платите на инженерите вклучени во развојот на вештачката интелигенција (ВИ), бидејќи има жестока борба за персонал во таа област.
Bloomberg
„’Тесла’ го зголемува надоместокот на вработените (во согласност со напредокот на проектот) во инженерскиот тим за вештачка интелигенција“, напиша тој во објавата на социјалната мрежа X, порано позната како Твитер. Компанијата „Опен еј-ај“, која стои зад четботот ЧетГПТ, „активно им нуди вработување на инженерите на „Тесла“ со огромни зголемувања на платите, а во неколку случаи, за жал, тие биле успешни“, додаде тој.
Коментарот на Маск всушност беше одговор на информациите за експертот за вештачка интелигенција на „Тесла“, Итан Најт, кој се пресели во стартапот „Екс еј-ај“ на Маск. „Итан речиси се пресели во ’Опен еј-ај’, па изборот беше таа компанија или ’Екс еј-ај’“, напиша тој.
Маск, чие богатство сега е трето по големина во светот, помогна во основањето на компанијата „Опен еј-ај“, но подоцна ја прекина соработката. Сега тој се занимава со вештачка интелигенција на неколку фронта - во „Тесла“ вештачката интелигенција се користи за развој на системи за автономно возење, а исто така го основа споменатиот стартап „Екс еј-ај“.
„Има 200 одлични инженери во тимот на ’Тесла’ за вештачка интелигенција и автономно возење“, изјави тој за „X нетворк“. „Темпото со кое ’Тесла’ развива автономно возење се забрзува. Војната за таленти за вештачка интелигенција е најлошата војна за вработување што сум ја видел“, додаде тој.
.webp){kind=icon}
