„Супер мајкро компјутер“ во центарот на шверцерски скандал

„Супер мајкро компјутер“ (Super Micro Computer Inc.), давател на компјутерски решенија за вештачка интелигенција, се најде во центарот на скандал за шверцување. Сега компанијата се обидува да ги засили своите активности во областа на усогласеност, но падот во петокот веќе избриша една третина од вредноста на компанијата.

„Супер мајкро компјутер“ во петокот соопшти дека на позицијата главен директор за усогласеност ја именува Деано Лула, а одлуката стапува на сила веднаш. Луна, која досега ја извршувала функцијата потпретседател за глобална трговска усогласеност и санкции, претходно работела во „Интел“ .

Овој потег следи по американската обвинителна постапка против сосновачот Јих-Шјан „Воли“ Лиау поради наводно испраќање во Кина сервери составени во САД, кои содржеле најнапредни чипови на компанијата „Енвидија“, што претставува прекршување на американските извозни контроли. Лиау и уште две лица поврзани со „Супер мајкро“ наводно ја продале опремата на неименувана компанија од Југоисточна Азија и го координирале нејзиниот конечен транспорт до кинески клиенти.

Случајот претставува нов шок за компанијата, која во последните две години се соочуваше со сметководствени проблеми. Иако растот на инвестициите во вештачка интелигенција помогна да се зголеми продажбата на „Супер мајкро“, која продава сервери и друга опрема за дата-центри, серијата проблеми ги потресе инвеститорите.

Компанијата доцна синоќа објави дека Лиау се повлекува од управниот одбор, кој отсега ќе брои осум членови.

Акциите на „Супер Мајкро“ по објавата на обвинението паднаа за 33 проценти, на 20,53 долари, што ја намали пазарната вредност на компанијата за повеќе од шест милијарди долари. Ова беше најголемиот еднодневен пад за компанијата со седиште во Сан Хозе, Калифорнија, од октомври 2018 година.

Според наводите во обвинителниот акт, шемата вклучувала напори на обвинетите и други лица да се избегне надзорот од ревизорите на „Супер Мајкро' и американската влада. Тоа наводно вклучувало фалсификување документи и подготовка на „лажни“ сервери, на кои со фен за коса ги отстранувале и повторно поставувале сериските броеви.

Во случајот беа обвинети и Руеи-Цанг „Стивен“ Чанг, кој делувал како генерален директор во тајванската канцеларија на „Супер Мајкро“, како и Тинг-Веи „Вили“ Сан, надворешен изведувач, кој американските органи го опишале како посредник што наводно учествувал во пренасочување на опремата.

„Супер Мајкро“ не е наведен како обвинет во обвинителниот акт. Компанијата во претходна изјава навела дека соработува со американските власти. Дополнително, соопшти дека Лиау и Чанг ги испратил на административен одмор и ја прекинал соработката со Сан.

Нивното наводно однесување „ги крши политиките и надзорните механизми на компанијата, вклучително и напорите за избегнување на важечките закони и прописи за извозна контрола,“ се наведува во соопштението на компанијата, додавајќи дека одржуваат силна програма за усогласеност и се посветени на целосно почитување на сите важечки американски закони и прописи за извоз.

„Супер Мајкро“ се обидува да се опорави по сметководствените проблеми. Компанијата во август 2024 година го пропушти рокот за поднесување на годишниот финансиски извештај, а ревизорската куќа „Ернст едн Јанг“ се повлече поради загриженост околу управувањето и транспарентноста. „Супер Мајкро“ потоа ги поднесе извештаите, но минатата година повторно следеше предупредување дека се откриени проблеми во нивните финансиски контроли.

За компанијата работите почнаа да се подобруваат минатиот месец, кога беа објавени податоци за посилна продажба од очекуваната. Приходите за периодот што завршува на 31 март ќе изнесуваат најмалку 12,3 милијарди долари, соопшти „Супер Мајкро“ на 3 февруари. Аналитичарите во просек прогнозираа 10,2 милијарди.

„Брзо се шириме за да поддржиме големи имплементации на решенија за вештачка интелигенција и компании, а истовремено продолжуваме да ја зајакнуваме нашата оперативна и финансиска изведба,“ изјави тогаш извршниот директор Чарлс Лианг.

Компанијата се труди да се позиционира како клучен добитник од растот на секторот за вештачка интелигенција.
Акциите на компанијата во 2023 година скокнаа за 246 проценти, иако растот наскоро се стабилизираше. Следната година добија 7,2 проценти, иако акциите на „Енвидија“  и други компании од областа на вештачка интелигенција продолжија нагло да растат. Во 2025 година забележаа пад од 4 проценти.

По падот во петокот, акциите на „Супер Мајкро“ во 2026 година се намалени за 30 проценти.