„Опен-еј-ај“ планира двојно да го зголеми бројот на вработени

„Опен-еј-ај“ планира речиси двојно да го зголеми бројот на вработени до крајот на 2026 година, во обид да ја одбрани својата позиција од конкуренцијата на „Антропик“ и „Алфабет“, пишува „Фајненшел Тајмс“.

Производителот на ВИ асистентот Чет ГПТ ќе се обиде да го зголеми бројот на вработени од околу 4.500 на приближно 8.000, наведува весникот, цитирајќи два извори со директни сознанија за случајот кои не биле идентификувани. Новите вработувања најмногу ќе бидат насочени кон развој на производи, инженеринг, истражување и продажба, според извештајот.

„Опен-еј-ај“  има изнајмено нов деловен простор во Сан Франциско за да го смести растечкиот број на вработени, со што нивното присуство во градот надминува 1 милион квадратни стапки, додаде весникот.

Компанијата веднаш не одговори на барањето за коментар.

Плановите за вработување доаѓаат во време на силна трка со конкурентите како „Антропик“ и „Мајкрософт“ за привлекување корпоративни клиенти кои користат ВИ како асистенти за програмирање.

Компании како „Опен-еј-ај“  претставија повеќе ВИ модели кои можат да извршуваат сè покомплексни задачи - од анализа на финансиски извештаи на компании до пишување код и генерирање неверојатно реалистични слики и видеа.

Минатата недела, „Опен-еј-ај“ откри планови да ја купи „Астрал“, стартап кој развива Python алатки за програмери. Порано во март, се согласи да ја купи ВИ безбедносната компанија Promptfoo, додавајќи алатки за тестирање и обезбедување на ВИ агенти пред нивно пуштање во употреба. Минатата година, купи стартапи како Software Applications Inc. и Neptune.

Компанијата исто така е во напредни разговори за формирање заедничко вложување со приватни инвестициски фирми, меѓу кои TPG Inc., Brookfield Asset Management и Bain Capital, кое би се фокусирало на зајакнување на употребата на нивниот ВИ софтвер, објави „Блумберг“.