„Опен еј-ај“ нема повеќе договор за ексклузивност со „Мајкрософт“

„Мајкрософт“ (Microsoft Corp.) и „Опен еј-ај“ (OpenAI) се согласија да престане ексклузивното право на софтверскиот гигант да ги продава моделите на вештачка интелигенција на стартапот на Сем Алтман, отворајќи ја вратата за креаторот  на „Чет ГПТ“ (ChatGPT) да склучува договори со конкурентите во областа на „компјутерските услуги во облак (cloud computing)“ како што е „Амазон“ (Amazon.com Inc.)

Во замена за прекинување на таа ексклузивност - којашто помогна во зголемувањето на продажбата на „облак“  производите на „Мајкрософт“ во раните години од бумот на вештачката интелигенција - најголемиот светски производител на софтвер повеќе нема да плаќа дел од приходите за производите на „Опен еј-ај“  што ги препродава во својот „облак“. Двете компании го објавија ревидираниот договор во заедничка изјава во понеделник.

Новиот договор има за цел да го поедностави комплицираниот однос што беше основа за подемот на „Опен еј-ај“ и поширокиот бум на вештачката интелигенција. „Опен еј-ај“ оттогаш склучува договори со повеќе провајдери на „облак услуги“, вклучувајќи го и „Амазон“, за да ги задоволи своите растечки потреби за компјутерска моќ за градење и одржување на софтвер со вештачка интелигенција на пошироката публика.

„Поголемата предвидливост во изменетиот договор ја зајакнува нашата заедничка способност да градиме и управуваме со ВИ платформи во голем обем, а воедно им обезбедува на двете компании флексибилност да бараат нови можности“, рекоа „Опен еј-ај“ и „Мајкрософт“ во нивната изјава.

Договорот од понеделникот го отвора патот за моделите на „Опен еј-ај“ да се појават на „Веб сервисите на Амазон – ВСА“ (Amazon Web Services) и други даватели на услуги за cloud computing.

Depositphotos

 

Како дел од инвестицијата објавена претходно оваа година, единицата на „Амазон“ изјави дека заеднички развива производи со „Опен еј-ај“ кои ќе бидат хостирани на „ВСА“. „Мајкрософт“ отпрвин  размислуваше за правни дејствија, со оглед на тоа дека напорите речиси сигурно би ги прекршиле неговите ексклузивни права врз интелектуалната сопственост на „Опен еј-ај“, објави „Фајненшл Тајмс“ минатиот месец.

„Мајкрософт“ останува „примарен клауд провајдер“ на „Опен еј-ај“, а новите производи од стартапот прво ќе бидат достапни на „Азур“ (Azure), клауд единицата на компанијата.

Уделот од приходите што го плаќа „Опен еј-ај“ за продажбата на своите производи што ги креира сам ќе биде ограничен, рекоа компаниите. Но, сè додека не го достигнат тоа ограничување - кое не беше откриено - ревидираниот договор носи поголема сигурност дека „Опен еј-ај“ ќе продолжи да ги врши тие исплати.

„Мајкрософт“  ќе добива удел од приходите од „Опен еј-ај“ до 2030 година, без оглед на напредокот што стартапот го прави кон својата цел за градење вештачка општа интелигенција - систем способен да ги надмине човечките способности низ задачите. Според претходниот договор, исплатите за удел во приходите требаше да престанат доколку „Опен еј-ај“  ја достигне таа пресвртница.

Како дел од реструктуирањето на „Опен еј-ај“ минатата година како профитен бизнис, „Мајкрософт“  доби 27 отсто удел во стартапот за вештачка интелигенција. Софтверскиот гигант беше клучен фактор во корпоративната реорганизација на „Опен еј-ај“ , бидејќи двете компании преговараа за сложените услови на нивното партнерство.

Односот на „Мајкрософт“ со „Опен еј-ај“  ќе биде во центарот на вниманието оваа недела, бидејќи компаниите ќе се соочат со еден од основачите на „Опен еј-ај“ Илон Маск на суд. Милијардерот го обвини „Опен еј-ај“ дека ги напуштил своите основачки принципи со претворање во профитна компанија со милијарди долари поддршка од „Мајкрософт“. Тој бара дури 134 милијарди долари отштета од „Опен еј-ај“  и „Мајкрософт“.

Акциите на „Мајкрософт“  паднаа за околу еден отсто по отворањето на пазарите во Њујорк во понеделникот. „Амазон“ падна за помалку од еден отсто.

„Не веруваме дека овој ревидиран договор треба да биде големо изненадување за инвеститорите во овој момент“, напишаа аналитичарите од „Еверкор“ (Evercore ISI) во белешка до клиентите во понеделник. „Мајкрософт сè повеќе сигнализира интерес за поширока стратегија со повеќе модели, додека Опен еј-ај има јасни стимулации за поширока дистрибуција низ целиот пазар.“

-Со помош на Броди Форд.