„Манус“ се обидува да се раздели од „Мета“ откако беше купен за 2 милијарди долари

Соосновачите на стартапот „Манус“ (Manus) разгледуваат опции за да го исполнат барањето на Пекинг за поништување на контроверзното преземање од страна на „Мета“ (Meta Platforms Inc.), вклучувајќи и план за собирање околу милијарда долари од надворешни инвеститори за повторно откупување на кинескиот ВИ-бизнис.

Тројцата соосновачи на „Манус“ - Шијао Хонг, Џи Јичао и Жанг Тао - водат разговори за инвестициски круг со процена на вредност што би била најмалку еднаква на 2 милијарди долари, колку што „Мета“ плати за преземањето на компанијата за вештачка интелигенција, наведуваат извори запознаени со ситуацијата. Според истите извори, основачите би можеле и лично да вложат средства за да го финансираат остатокот од трансакцијата.

Доколку планот се реализира, следниот чекор би бил трансформација на „Манус“ во кинески заеднички проект со новите инвеститори, по што би следувала иницијална јавна понуда (ИПО) во Хонгконг.

Овие разговори ја нагласуваат контроверзноста околу преземањето на „Манус“ од страна на „Мета“, кое предизвика загриженост во Кина за губење клучна технологија и талент во корист на американска компанија.

Критичарите укажуваат дека компанијата, која првично била основана во Кина, а потоа преместена во Сингапур, била структурирана на начин што го олеснил преземањето. Во април кинеските регулатори побараа поништување на договорот, иако поголем дел од трансакцијата веќе беше завршен.

Иако планот за повторно откупување е сè уште во рана фаза, некои од инвеститорите покажале интерес за учество, имајќи предвид дека „Манус“ се очекува да генерира околу милијарда долари приходи годинава.

Сепак, разговорите остануваат во тек, а конечна одлука сè уште не е донесена. Постои и значителна неизвесност околу процената на компанијата и начинот на кој новите сопственици би ја издвоиле ВИ-технологијата, која веќе е интегрирана во системите на „Мета“.

Доколку договорот навистина се поништи, процесот на раздвојување би бил исклучително сложен. Некои од вработените во „Манус“ веќе  ѝ се приклучија кон „Мета“, дел од капиталот е префрлен, а извршни лица на стартапот се интегрирани во ВИ-тимовите на американската компанија.

Дополнително, вработени на „Манус“ веќе работат во канцелариите на „Мета“ во Сингапур, додека инвеститори како „Тенсент“ (Tencent Holdings Ltd.), „Женфонд“ (ZhenFund) и ХСГ (HSG) веќе ги добиле своите исплати.

Случајот се вклопува во пошироките напори на Пекинг да спречи пренос на чувствителна технологија кон геополитички конкуренти. Паралелно, кинеските власти воведуваат построги ограничувања за пристап до странски капитал и за котација на кинески компании во Хонгконг.

Во тој контекст, случајот „Манус“ станува пример за зголемената тензија меѓу технолошкиот сектор и геополитичките интереси, како и за ризиците од трансакции што ги преминуваат границите на регулаторната контрола.