Електрификацијата останува главен двигател на растот на „Сименс енерџи“

„Сименс енерџи“ (Siemens Energy AG) се обиде да ги увери инвеститорите дека побарувачката за гасни турбини ќе остане силна и следната година, посочувајќи дека центрите за податоци, кои трошат огромни количества електрична енергија, се само еден од повеќето двигатели на глобалниот тренд на електрификација.

„Вештачката интелигенција е важен фактор и ќе остане важен сегмент на пазарот на гасни турбини, но очигледно постојат и многу други проекти низ светот“, изјави во средата главниот извршен директор Кристијан Брух во интервју за Блумберг ТВ. „Не се врти сè околу ВИ.“

„Сименс енерџи“ има корист од наглиот раст на нарачките за компоненти како гасни турбини и електроенергетска мрежна опрема, потребни за напојување на центрите за податоци, особено во САД. Но, инвеститорите почнаа да се прашуваат колку брзо овие нарачки ќе се претворат во приходи, по нестабилноста на технолошките акции што ги поттикна стравувањата дека инвестициите во инфраструктура за вештачка интелигенција со текот на времето би можеле да забават.

Акциите на американскиот конкурент на „Сименс енерџи“, „ГЕ Вернова“ (GE Vernova Inc.), нагло паднаа минатиот месец откако компанијата објави резултати што не ги исполнија високите очекувања на пазарот.

Брух рече дека позитивниот тренд на пазарот на гасни турбини останува непроменет бидејќи комуналните компании и технолошките фирми продолжуваат да ја прошируваат електроенергетската инфраструктура. Тој додаде дека компанијата и натаму гледа силна побарувачка и за 2027 година и не забележува откажувања на нарачки од клиентите. Истовремено, нагласи дека конвенционалниот електроенергетски сектор и понатаму е најголемиот клиент на компанијата и сочинува најголем дел од книгата нарачки.

Компанијата останува воздржана со инвестициите, а плановите за проширување на производствените капацитети за турбини остануваат непроменети. Годинава таа најави инвестиции од една милијарда евра (1,2 милијарди долари) за проширување на производството на енергетска опрема во САД, вклучувајќи гасни турбини и трансформатори.

„Она што се обидуваме да го направиме е максимално да ја зголемиме продуктивноста во нашите постојни производствени капацитети“, рече Брух. „Многу внимаваме да не создадеме прекумерна понуда што би можела да ни наштети во следната деценија.“

Воздржувањето од понатамошно проширување е и одговор на една од главните грижи на инвеститорите – дека производителите би можеле да изградат преголеми капацитети доколку побарувачката за електрична енергија, поттикната од вештачката интелигенција, се промени. Подобрувањето на ефикасноста на ВИ би можело да ја намали вкупната потрошувачка на електрична енергија, што отвора прашања дали индустријата ги преценува долгорочните потреби за електрична енергија.

Блумберг интелиџенс вели:

Резултатите на „Сименс енерџи“ за третиот квартал покажуваат дека квалитетот на заработката се подобрува побрзо отколку што очекува пазарниот консензус. Нарачките во секторот за гасни услуги беа за повеќе од 20 отсто над проценките и вклучуваа 12 гигавати претворени од резервации во цврсти нарачки, со што се намалија стравувањата за стабилноста на книгата нарачки. Профитната маржа од 17,3 отсто пред посебните ставки покажува дека подобрената профитабилност на новите нарачки за единици ја зголемува заработката. Извршувањето на проектите во секторот за електроенергетска мрежа остана силно и покрај мало потфрлање на профитот, додека првата квартална добивка на „Сименс Гамеса“ од 2022 година наваму ги надминува слабите нарачки, кои во голема мера беа последица на отсуството на нови договори за офшор ветерни паркови“, вели Омид Вазири, виш индустриски аналитичар во „Блумберг интелиџенс“.

Претходно во средата, германската инженерска компанија соопшти дека очекува профитната маржа пред посебните ставки за целата фискална година да биде на горната граница од претходно проектираниот распон од 10 до 12 отсто, откако објави рекордни квартални нарачки што ги надминаа проценките на аналитичарите. Акциите пораснаа за најмногу 5,7 отсто во раното тргување во Франкфурт, со што нивниот раст од почетокот на годинава достигна 31 отсто.

Бумот во изградбата на центри за податоци ги поттикна клиентите да плаќаат неповратни надоместоци за резервација за да обезбедат производствени капацитети за турбини, кои се ограничени. Тоа помогна да се зголеми слободниот паричен тек во минатиот квартал, а книгата нарачки достигна рекордни 162 милијарди евра.

Иако побарувачката за гасни турбини и опрема за електроенергетската мрежа беше главниот двигател на профитот, најголемо подобрување на заработката забележа бизнисот со ветерна енергија. „Сименс Гамеса“ ја оствари својата прва квартална добивка по речиси четири години и соопшти дека е на добар пат оваа година да достигне точка на рентабилност.

„Сименс енерџи“ исто така ја разгледува иднината на својот сектор -Трансформација на индустријата. Оваа деловна единица вработува околу 17.000 луѓе и произведува компресори, парни турбини и системи за складирање енергија.

Компанијата соопшти дека ја разгледува најдобрата долгорочна организациска поставеност за оваа дивизија, реагирајќи на написот на магазинот „Менаџер“ (Manager Magazin) од јуни за можно издвојување во посебна компанија. Брух нагласи дека компанијата сè уште нема донесено одлука за иднината на овој бизнис и рече дека треба да обезбедат овие бизниси да продолжат успешно да работат во предизвикувачка конкурентска средина во следните три, пет или десет години“.

-Со придонес од Лизи Бурден.