Во значително отежнати услови за работа пред се поради енормното зголемување на цените на енергенсите „Макстил“ во периодот јануари-септември, годинава успеа да оствари добивка од 720 милиони денари (11,7 милиони евра), што е зголемување за 43 проценти во однос на истиот период минатата година кога компанијата имала добивка од 505 милиони денари (8,2 милиони евра).
Од „Макстил“ информираа дека во трите квартали од 2022 година се остварени приходи од работење во износ од 8,27 милијарди денари (134 милиони евра), од кои приходите од продажби како носечка ставка во структурата на вкупните приходи учествуваат со дури 99,5 проценти. Споредено со истиот период од 2021 остварените приходи од работењето се приближно двојно повисоки.
„Покрај разликата во испорачаните количини и поповолните ценовни односи, во извештајниот период е евидентна и разлика и во структурата на испораките во полза на поголемо учество на сопствените продажби за сметка на испораките по основ на договори за преработка“, велат од компанијата.
Во првите девет месеци од работењето, „Макстил“ има расходи од 7,13 милијарди денари(115 милиони евра), што е речиси двојно повеќе во однос на истиот период во 2021 година.
„Тоа главно се должи на зголемениот обем на производство на готовиот производ во текот на овој период, како и зголемување на трошоците на влезните материјали и енергенси, а особено на природниот гас, каде што има зголемување од околу 500 проценти во однос на истиот период во 2021 година, како и цената на електричната енергија каде е регистрирано зголемување од приближно 400 проценти. Овие зголемувања на цените на енергенсите предизвикаа зголемување на цените на сите други влезни материјали, како што се другите технички гасови, техничките води и феролегурите“, објаснуваат од компанијата.
Оттаму потенцираат дека изминатиот период, а особено третиот квартал „Макстил“се соочил со бројни предизвици како резултат на значително влошеното глобално економско опкружување.
„Геополитичката нестабилност и конфликтите се примарниот извор на неизвесност покрај инфлацијата, нарушената стабилност на цените на енергијата како и нарушувањата на синџирите на снабдување. Сите овие фактори извршија влијание врз побарувачката на нашите производи која е директно условена од текот на инвестициските проекти на нашите деловни партнери од Западна Европа и Турција. Со добра организација на деловните активности како и ползување на залихите од претходниот период „Макстил“ успеа навремено да одговори на барањата на купувачите и правилно да ја ползува својата пазарна позиција“, велат од компанијата.
Оттаму додаваат дека очекувањата за последниот квартал од годинава не се оптимистички во поглед на нарачките и во поглед на дополнителните притисоци за зголемување на цените на енергенсите и влезните материјали, предизвикани од инфлаторните притисоци, кои во изминатиот период беа дури повисоки и од инфлацијата во 1980-тите.
„Кризата во снабдувањето со гас во Европа и влошувањето на руско-украинската војна дополнително ни ги отежнуваат условите за работење и наметнуваат потреба од постојано прилагодување на плановите за работење. Во вакви услови и нашата компанија исто како и целата светска економија ја плаќа високата цена на воениот конфликт“, велат од компанијата.
.webp){kind=icon}
