Која е белградската компанија што влезе во „Гранит“?

Белградската компанија „Бард-Коп“ (Bard-Kop DOO) е новиот акционер што има пет отсто од акциите издадени од градежната компанија „Гранит“. Според известувањето што до Македонската берза го испратија од домашната компанија, како и според увидот во Централниот депозитар за хартии од вредност, оваа компанија со седиште во Нов Белград сега поседува 155.346 обични акции од издавачот на хартии од вредност ГД „Гранит“ АД Скопје, кои претставуваат 5,61 проценти од вкупните акции со право на глас.

„Блумберг Адрија“ во неколку наврати пишуваше за акционерските поместувања во „Гранит“, а според најновата состојба, освен „Бард-Коп“, акции над пет отсто од вкупниот капитал сега поседуваат градежното друштво „Гранит“, со посед од 9,81 отсто обични акции, и Ивана и Зоран Милковски, кои имаат 8,84 отсто и 8,9 отсто, соодветно.

Нашите анализи за белградската компанија што стана поголем акционер во „Гранит“ покажуваат дека станува збор за фирма што е основана во октомври 2019 година, чија основна дејност е изградба на патишта и на автопатишта. Според финансиските податоци, компанијата во 2020 година имала вкупни приходи од 91,8 милион динари (783.366 евра) и 269,7 милиони динари (2,3 милиони евра) во 2021 година.

Минатата година вкупната добивка на друштвото било 73,7 милиони динари (628.718 евра). Во 2021 година фирмата имала 45 вработени.

Како што пишувавме, отворениот задолжителен пензиски фонд „Сава пензиски фонд“ излезе од сопственичката структура на „Гранит“ откако на јавна аукција, одржана на Македонската берза, беше продаден пакет од 236.120 акции од градежната компанија. Пакетот на акции, кој претставуваше 7,69 проценти од сопственоста на „Гранит“, се продаде по цена од 1.450 денари за акција, односно за вкупна сума од 342 милиони денари (околу 5,5 милиони евра).

Претходно засилено купуваше акции и менаџментот на градежната компанија.

Во моментов нема коментари за веста. Биди прв да коментира...

Остави коментар