По анкетата, Маск вели дека само оние со претплата ќе можат да гласаат на Твитер

Твитер (Twitter) ќе го ограничи гласањето за големи промени на платформата на корисниците што плаќаат за услугата „твитер блу“ (Twitter Blue), изјави сопственикот на компанијата Илон Маск во еден од своите први твитови по анкетата чии резултати покажаа дека мнозинството корисници сака тој да се повлече од функцијата извршен директор на „Твитер“. 

Одговарајќи на пораката на еден претплатник на „твитер блу“, Маск се согласи со предлогот дека само корисниците на таа услуга треба да имаат право на глас кога во иднина ќе се одлучува за платформата, додавајќи: „Твитер ќе ја направи таа промена“. Еден ден претходно, милијардерот вети дека ќе ги става на јавно гласање сите важни одлуки за насоката по која ќе се развива социјалната мрежа и им понуди на корисниците на Твитер глас во однос на лидерството, прашувајќи ги дали треба да се повлече.

Повеќе од 10 милиони, или 57,5 отсто од гласовите, беа за тоа Маск да се откаже од улогата шеф на „Твитер“. Тој допрва треба јавно да се осврне на резултатите од анкетата, откако претходно се обврза дека ќе ја почитува волјата на корисниците. Драматичната анкета на Маск дојде веднаш откако тој присуствуваше на финалниот натпревар на Светското првенство во Катар и за кратко стана главна тема на Твитер. Тој не понуди предлог за нов лидер на компанијата и отиде дотаму што рече дека секој способен да ја врши работата едноставно нема да сака да ја прифати.

Маск предупреди дека „Твитер“ е во ризик од банкрот и воспостави „тврдокорна“ работна средина за преостанатите работници, по драстичното намалување на персоналот. За помалку од два месеца откако тој е на чело на компанијата, предизвика страв меѓу огласувачите, исклучи некои од најревносните корисници на платформата (пред сè новинари) и го претвори сервисот од рефлексија на главните вести на денот во главна вест сам по себе.

Во моментов нема коментари за веста. Биди прв да коментира...

Остави коментар