Државата од Банкмен-Фрид може да одземе имот од 700 милиони долари

Богатството на Сем Бенкмен-Фрид од речиси 700 милиони долари ќе биде одземено доколку биде осуден за измама, според федералните обвинители кои го гонат основачот на криптоберзата FTX.

Во судски поднесок од петокот, американскиот обвинител за јужниот округ на Њујорк, Демијан Вилијамс, наведува 10 сметки кои содржат мешавина од акции, готовина и криптовалути, подложни на заплена.

Средствата вклучуваат и околу 55 милиони акции на Бенкмен-Фрид во „Робинхуд маркетс“ (Robinhood Markets Inc). По цената на затворање во петокот, тие акции беа проценети на 526 милиони долари. Американското Министерство за правда претходно објави дека ги запленило акциите, кои биле купени со заем од 456 милиони долари од „Аламеда рисрч“ (Alameda Research), сестринска компанија на FTX.

Списокот на средства кои подлежат на одземање, исто така, вклучува повеќе од 20 милиони долари на сметка на име „Емерџент фиделити технолоџис“ (Emergent Fidelity Technologies), холдинг-компанија користена за купување акции, повеќе од 171 милиони долари на сметка под името FTX Digital Markets и средства на три налози на „Бајненс“ (Binance). Владата ги запленила сметките што ја содржат готовината помеѓу 4 јануари и 19 јануари, според поднесокот.

Обвинителите користат налози за одземање имот како начин за враќање на незаконски стекнатото богатство од обвинетите. Во случајот Берни Медоф, судијата наложи покојниот измамник кој користел Понзи шема да предаде повеќе од 170 милијарди долари, а неговата сопруга 80 милиони долари. На Рос Улбрихт, основачот на мрачниот дарк веб „Силк роуд“ (Silk Road) му беше наложено да предаде биткоини во вредност од околу 28 милиони долари како дел од налогот за одземање имот во 2014 година.

Bloomberg

Банкмен-Фрид се изјасни за невин по обвинението од осум точки, вклучително и измама и прекршување на законот за финансирање. Тој е обвинет дека користел средства од клиентите на FTX за да го поттикне тргувањето во „Аламеда“, да плати лични трошоци и недвижен имот. 30-годишникот моментално е пуштен со кауција откако потпиша договор вреден 250 милиони долари со кој практично е ставен во домашен притвор во домот на неговите родители во Калифорнија.

Новото раководство на FTX, вклучително и специјалистот за реструктуирање Џон Џеј Реј Трети, успеа преку стечајна постапка да пронајде милијарди долари во средства поврзани со крипто-империјата.

Случајот е US v Bankman-Fried, 22-cr-673, Окружен суд на САД, јужен округ Њујорк (Менхетен).