Комерцијална банка лани оствари добивка од 35 милиони евра

Комерцијална банка лани оствари добивка пo оданочување од 2,14 милијарди денари(околу 35 милиони евра), што е за 6,7 проценти помалку во однос на претходната  година, покажува неривидираниот неконсолидиран биланс на успех на банката објавен преку Македонската берза. 

„Позитивниот резултат од работењето банката го оствари во кризна година во која сѐ уште беа присутни ризиците поврзани со пандемијата со ковид-19, но исто така економијата беше соочена со шокови поврзани со енергетската криза и зголемена инфлација како резултат на воениот конфликт помеѓу Русија и Украина. Ваквите состојби поттикнаа затегнување на монетaрната политика од страна на Народната банка со цел да се стабилизира растот на цените, да се спречи натамошно намалување на куповната моќ кај населението и да се овозможи поголема предвидливост при носењето деловни одлуки кај економските субјекти“, коментираат од банката.

Остварената добивка пред исправка на вредност, која претставува показател за оперативната способност на банката да ги покрива расходите од работењето, е за 3,8 проценти помала во однос на минатата година и во најголем дел е резултат на помалиот износ на наплатени претходно отпишани побарувања и помалку реализирани приходи од капитална добивка од продажба на преземен имот.

„Наспроти тоа, приходите од редовно работење (нето приходи од камати, нето приходи од провизии и надомести и нето курсните разлики) се зголемени како резултат на остварениот солиден раст на деловните активности реализирани во банката во услови на криза“, велат од банката. 

Нето-исправката на вредност на финансиските средства заклучно со 31.12.2022 година изнесува 994 милиони денари (16,1 милиони евра), што претставува зголемување од 6,4 проценти во однос на 2021 година.

„Зголемувањето на нето-исправката на вредност на финансиските средства се должи на зголемениот обем на кредитирање, но и поради зголемена строгост во проценката на кредитниот ризик од страна на менаџментот на банката, при што како резултат на неповолните состојби во економијата беше издвоен поголем износ на резервации за корпоративното портфолио. Притоа, во последниот квартал од 2022 година е утврден значителен износ на дополнителна исправка на вредноста на финансиските средства, пред сѐ кај комитенти кај кои веќе подолго време производниот процес е во мирување поради високите цени на енергенсите или поради времени мерки на надлежни судски органи со кои времено се блокираше располагањето со финансиските средства кај одредени комитенти“, соопшти банката.

Вкупните приходи од работењето изнесуваат околу 5,5 милијарди денари (89,7 милиони евра) и бележат зголемување од 0,8 проценти во однос на минатата година. Нето-приходите од камата претставуваат основна компонента во формирањето на вкупните приходи од работењето и на 31.12.2022 година изнесуваат околу три милијарди денари (50 милиони евра) и бележат зголемување од 26,1 проценти.

„Порастот на нето-приходите од камата главно е резултат на зголемено кредитирање кај нефинансиските друштва и домаќинствата, како и по основ на зголемени каматни стапки на благајничките записи и на депозитите пласирани во НБРСМ, зголемени каматни стапки и зголемени пласмани во домашни и две странски банки и зголемено вложување во државни хартии од вредност. Планот за анализираниот период е остварен со 119,9 проценти“, информираат од банката.

Нето приходите од провизии и надоместоци на 31.12.2022 година изнесуваат околу милијарда денари или 17 милиони евра и во однос на истиот период од минатата година бележат зголемување од 7,4 проценти, во најголем дел како резултат на зголемен обем на реализирани активности.

„Нето приходите од курсни разлики на 31.12.2022 година изнесуваат 336,3 милиони денари (5,4 милиони евра)  и бележат зголемување од 70,4 проценти, што во најголем дел е резултат на значително зголемениот промет на девизен пазар со правни лица. Планот за анализираниот период е остварен со 200,2 проценти“, информираат од банката.

Останатите приходи од работењето на банката на 31.12.2022 година изнесуваат 941,4 милиони денари  (15 милиони евра) и бележат намалување од 45,4 проценти. 

„Во периодот од 01.01-31.12.2022 година банката прокнижи загуба поради оштетување на нефинансиските средства на нето основа во износ од 9,7 милиони денари (157.000 евра) и истата е евидентирана по основ на 20 проценти оштетување на нето-вредноста на преземениот имот согласно регулативата на НБРСМ“, велат од Комерцијална банка. 

Во моментов нема коментари за веста. Биди прв да коментира...

Остави коментар