„ОКТА“ минатата година оствари добивка од 545,9 милиони денари (8,8 милиони евра), што е зголемување за 44 проценти во однос на претходната година кога добивката на компанијата изнесувала 378,1 милиони денари (6,1 милиони евра), покажува билансот на успех на компанијата објавен преку Македонската берза.
„Годината ја одбележа геополитичка тензија која ја влоши енергетската криза во Европа, дополнително зголемувајќи ги цените на природниот гас и електричната енергија, што доведе до зголемен инфлациски притисок кој негативно влијаеше врз потрошувачите и индустријата. Постепеното воведување на санкции од страна на ЕУ и нафтеното ембарго ги натераа повеќето европски земји да го намалат или запрат увозот на руски нафтени производи и гас, што предизвика нерамнотежа меѓу побарувачката и понудата. Ваквите движења значително ги покачија цените на суровата нафта и гас. Во овие услови, државата ги врати во функција капацитетите за производство на електрична енергија кои користат мазут“, велат од компанијата.
Оттаму додаваат дека и покрај конкурентното и предизвикувачко опкружување во земјава и Косово, компанијата успеала да ја зголеми својата лидерска позиција на локалниот пазар со пазарен удел од речиси 71 проценти, како и во Косово со удел од 36 проценти на крајот од 2022 година, што довело до зголемување на продажбата од 28 проценти на крајот од годината споредено со 2021 година.
„Минатогодишните солидни резултати на „ОКТА“ целосно ја потврдија стратегијата што компанијата ја спроведува решително и посветено веќе со години. Компанијата не само што успешно обезбеди раст на обемот на продажба во текот на целата година и зголемување на приходите од продажба и профитабилноста, туку и напредува со своите иницијативи за автоматизација кои ќе ја оптимизираат организацијата, намалувајќи ги трошоците и создавајќи цврста основа за идни резултати“, велат од компанијата.
.webp){kind=icon}
