„Твитер“ (Twitter Inc.) престана да биде независна компанија откако се спои со новоформирана шел-компанија наречена „Екс корп“ (X Corp.), што ги поттикна шпекулациите за тоа што Илон Маск има намера да прави со платформата за социјално вмрежување.
„Твитер“ „повеќе не постои“ откако бил споен со „Екс корп“, според документ од 4 април поднесен во судот во Калифорнија, за тужба против компанијата и нејзиниот поранешен главен извршен директор Џек Дорси од конзервативната активистка Лора Лумер.
Не е јасно што значи промената за „Твитер“, кој доживеа огромен ремонт откако Маск ја купи компанијата за 44 милијарди долари минатата година. Милијардерот во минатото сугерираше дека купувањето на „Твитер“ би било „забрзување“ кон создавање на „Екс“ (X) - која тој ја нарече „апликација за сè“. Маск твитна за потегот во вторникот, во објава што го содржеше само знакот „Х“.
Вториот најбогат човек на светот ја изрази својата желба да ја направи „Екс“ слична на кинеската Вичет (WeChat), суперапликација во сопственост на „Тенсент“ (Tencent Holdings Ltd.), која се користи за сè, од плаќања и резервации на билети за настани до пораки. Но тој беше нејасен како ќе се вклопи тоа во неговата голема деловна империја, почнувајќи од гигантот за електрични автомобили „Тесла“ (Tesla Inc.) до „Спејс екс“ (Space Exploration Technologies Corp.). Маск го поседува и доменот „X.com“ - име на компанија за онлајн плаќања што ја основа и на крајот ја спои со „Пејпал“ (PayPal).
Bloomberg
Маск за првпат формираше трио од холдинг-компании во Делавер со варијација на името „Екс холдингс“ (X Holdings) во април минатата година, како дел од неговата понуда за преземање на „Твитер“. Но „Екс корп“ е основана на 9 март во Невада, а нејзиното спојување со „Tвитер“ е поднесено на 15 март, според записите поднесени во сојузната држава. Маск е претседател на фирмата и нејзината мајка, „Екс холдингс корп“ (X Holdings Corp.), која исто така е основана минатиот месец и има одобрен капитал од 2 милиона долари, покажуваат документите.
.webp){kind=icon}
