„Мета“ (Meta Platforms Inc.) в среда ќе започне со отпуштања низ компанијата, бидејќи ги реструктурира тимовите и се стреми кон постигнување поголема ефикасност, што е цел на основачот Марк Закерберг.
Матичната компанија на социјалната мрежа Фејсбук ги известила менаџерите дека денеска ќе објави нови отпуштања во документ во кој „Блумберг њуз“ имал увид. Во документот се наведува дека отпуштањата се однесуваат на Фејсбук, Ватсап (WhatsApp), Инстаграм (Instagram) и Ријалити лабс (Reality Labs) - делот од компанијата што се занимава со виртуелна реалност и производство на уредите од линијата „Квест“ (Quest). Овој потег е дел од стратегијата за намалување на трошоците со која ќе се намали работната сила за 10.000 работни места, како што објави Закерберг во март. Следниот круг на кратења ќе следува во мај.
Bloomberg Mercury
Во ноември „Мета“ отпушти околу 13 отсто од својата работна сила или околу 11.000 вработени. Компанијата исто така во првиот квартал ја остави во сила забраната за нови вработувања. Други компании од Силициумската Долина повлекоа слични потези во текот на овој квартал. Коментарите на Закерберг укажуваат на тоа дека компанијата ќе се стреми да го намали бројот на работници и да го балансира односот на технолозите и инженерите од една страна и деловниот и административниот персонал од друга.
Во пораката до менаџерите пишува дека тимовите ќе се реорганизираат, а преостанатите вработени ќе бидат распоредени да работат под нови менаџери.
Прочитајте повеќе: „Мекдоналдс“ дели онлајн откази, расте гневот кај вработените
„Мета“ ќе побара од сите вработени во Северна Америка што можат да работат оддома да го сторат тоа в среда, за да имаат време да ги апсорбираат вестите, се наведува во документот.
Портпаролот на компанијата одби да коментира, укажувајќи на најавата на Закерберг за „година на ефикасност“ од март, во која се вели: „Очекуваме да објавиме реструктурирање и отпуштања во нашите технолошки групи кон крајот на април, а потоа и во нашите деловни групи кон крајот на мај“.
.webp){kind=icon}
