Пазарната вредност на модниот конгломерат ЛВМХ (LVMH - Moët Hennessy Louis Vuitton), благодарение на растот на продажбата на луксузни стоки во Кина и зајакнувањето на еврото, достигна 500 милијарди долари, што ја прави прва европска компанија што остварила ваква сума.
Овие бројки беа објавени помалку од две недели откако ЛВМХ стана една од десетте најголеми компании во светот, поттикната од растот на продажбата во првиот квартал. Ривалската компанија „Хермес“ (Hermes International) истовремено ги објави своите резултати, кои исто така беа силни и го потврдуваат ставот дека отворањето на Кина по пандемијата го поттикна растот во оваа индустрија.
Растот на вредноста на компанијата го зголеми и богатството на Бернард Арно, кој преку низа аквизиции го направи ЛВМХ еден од најмоќните конгломерати во светот. Неговото богатство, според индексот на милијардери на „Блумберг“, моментално е речиси 212 милијарди долари.
Прочитајте повеќе: Бернард Арно стана трет тајкун со богатство од над 200 милијарди долари
Вредноста на акциите на париската компанија во 10.43 часот претпладне порасна за 0,3 отсто, на 903,70 евра, со што компанијата достигна вредност од 454 милијарди евра (500 милијарди долари).
Побарувачката за производите на ЛВМХ - меѓу кои се чанти од „Луј Витон“, фустани од „Кристијан Диор“ (Christian Dior) и шампањ „моет“ - остана на нагорна траекторија дури и кога растечката инфлација и повисоките референтни каматни стапки ги зголемија ризиците светската економија да западне во рецесија.
ЛВМХ ги предупреди инвеститорите овој месец дека растот во САД забавува, особено е погодена побарувачката за коњак и кожени производи, а некои инвеститори се загрижени дека акциите неизбежно ќе ја загубат вредноста доколку економското забавување се влоши.
Засега, парадоксално, стравувањата од рецесија ја зголемуваат вредноста на ЛВМХ во долари. Овој месец еврото се искачи на највисокото ниво во повеќе од една година, додека доларот падна, поттикнат од пазарните прогнози дека влошувањето на американската економија ќе ја забрза одлуката на Федералните резерви (ФЕД) за намалување на каматните стапки во текот на годинава.
Depositphotos
Поради остриот раст, аналитичарите ги зголемија прогнозите за акциите на ЛВМХ. Тие гледаат простор за понатамошни придобивки бидејќи 30 од 36 аналитичари следени од „Блумберг“ имаат рејтинг еквивалентен на купување.
Ешли Валас од Банката на Америка (Bank of America Corp.) прогнозира дека вредноста на акциите на компанијата до следната година ќе достигне 1.000 евра. „ЛВМХ е премногу евтин со оглед на тоа колку е атрактивен секторот на луксузни стоки, силата на неговото портфолио и најдобрите перформанси во својата класа“, напиша Валас во извештај објавен на 13 април.
Арно (74) е претседател на управниот одбор и извршен директор на ЛВМХ.. Тој и неговото семејство поседуваат 48 отсто од акционерскиот капитал на ЛВМХ, поставувајќи ги темелите за семејството да ја задржи контролата врз компанијата во наредните децении.
.webp){kind=icon}
