.webp){kind=icon}
Игор Милев, новиот претседател на Одборот на директори на „Македонски телеком“, ќе добива месечен надоместок за својата работа таму од 155.000 денари нето-износ.
Компанијата денеска преку берзата извести дека на седницата на годишното собрание на друштвото е ставена точка на дневен ред со која се „определува нов месечен надоместок за претседателот на Одборот на директори во нето-износ од 155.000 денари“.
Владата го предложи Игор Милев за претседател на Одборот на директори на „Македонски телеком“ од редот на неизвршни членови во мај оваа година, а откако Зоран Китанов, дотогашниот предлог и претседател, одлучи да се повлече од таа позиција.
Утврдувањето на новиот месечен надоместок практично значи дека Милев ќе зема повеќе од двојно помалку од својот претходник. Според извештајот за работењето на „Македонски телеком“ за 2022 година, во текот на која Китанов беше претседател, тој за ангажманот добивал по 372.000 денари месечен надоместок. Во предлог-одлуката за утврдувањето на новиот месечен надоместок на Милев стои и дека освен неговиот надоместок, друго не се менува, односно другите членови ќе земаат иста сума како досега.
Членови на Одборот на директори се и Садула Дураки, кој минатата година имал надоместок од 93.000 нето, но и Нина Ангеловска, со надоместок од 62.000 во нето-износ, колку што добивале и Бардул Насуфи, Шкодране Дарлишта и Аќиф Медиу. За другите членови нема достапи податоци.
Игор Милев во „Телеком“ влезе од Царинската управа, каде што работеше како советник на генералниот директор. Претходно освен во ДИК, Милев беше раководител на правната служба на „Јака 80“ од Радовиш.
Владата поседува 34,81 отсто во компанијата и златна акција.
Годишното собрание е закажано за 21 јули.
