Еден од најбогатите Словенци, Санди Чешко најверојатно не успеал во обидот да ја спаси групацијата „Студио Модерна“ од банкрот, пренесува веб-порталот „Нецензурирано“. Кон средината на мај Чешко ги продаде брендовите на „Студио Модерна“, меѓу кои и „Топ шоп“, „Делимано“ и „Дормео“, на швајцарската компанија во сопственост на Дарко Хорват.
„Имаме предизвици една година, односно откако ја презедов компанијата. Им гарантираме плати на работниците, но не редовно“, изјави Чешко за „Блумберг Адрија“, а за можноста за банкрот рече дека сè уште не се откажал од компанијата.
Според неофицијалните информации на порталот „Нецензурирано“, работниците уште не ги добиле мајските плати. Деловниот извештај на групацијата од претходната година сè уште не е објавен, а сметките на групацијата се блокирани. Чешко во изминатите две недели започна да ја намалува листата на лица за отказ, со што од 43 до 263 вработени останаа без работа. Како што се тврди, поради недостиг од резерви, приходите на групацијата оваа година се намалени речиси за една третина.
Чешко му предаде на Хорват десетици бренда, меѓу кои „Дормео“, „Делимано“, „Ровус“, „Топ шоп“ и „Космодиск“, кои за мала сума пари ги купи компанијата на Хорват, „Дормео“, специјално формирана за оваа намена во Швајцарија. Исто така, Хорват ги презеде и патентите од Чешко.
„Ќе ги решиме финансиските проблеми на ’Студио Модерна’ со купување производи од ’Дормео’ по поволни услови“, изјави тогаш Чешко за „Блумберг Адрија ТВ“. Според него, проблемите на „Студио Модерна“ започнале со војната во Украина и затворањето на рускиот пазар, што ги обесхрабрило американските инвеститори со кои биле договорени, а Хорват го препознал потенцијалот во брендовите што ќе ги развиваат заедно.
Според „Нецензурирано“, спасувачките планови на „Студио Модерна“ очигледно не се оствариле, но официјално не е познато зошто. Чешко не сакаше да зборува за шпекулациите со Хорват, само рече дека сето она што го кажал пред еден месец засега сè уште е точно. Од ова може да се заклучи дека разговорите со Хорват сè уште се во тек. „Немам ништо ново да кажам за тоа“, додаде Чешко.
Според неофицијални информации, финансиските проблеми биле едноставно преголеми. Како што кажа Чешкo на средината на мај, најголем проблем се недостигот од стоки и празните резерви наспроти зголемената побарувачка.
Групацијата „Студио Модерна“ е компанија основана во 1992 година во Словенија, која имаше директна продажба само на еден бренд - „Космодиск“. Сите брендови од оваа групација долги години се достапни и на македонскиот пазар. Освен во Македонија, „Студио Модерна“ е присутна и во 19 други држави, со повеќе од пет илјади вработени.
.webp){kind=icon}
