Адвокати поднесоа колективна тужба против авиокомпанијата „Квантас“ (Qantas Airways) во Австралија, тврдејќи дека превозникот не им надоместил на патниците за откажаните летови за време на пандемијата. Со тоа компанијата незаконски профитирала, задржувајќи милијарда долари од средствата на клиентите.
Австралиската авиокомпанија се збогатила преку издавање кредитни белешки за летови при строги услови за патување, со бескаматно финансирање на сметка на клиентите, според тужбата поднесена во Федералниот суд минатата недела и доставена до „Квантас“ во понеделникот. „Квантас“ во соопштение посочи дека ги отфрла таквите тврдења.
„По укинувањето на ограничувањата за патување поради ковид, цените на билетите се зголемија, принудувајќи ги клиентите да плаќаат повеќе за нови летови во однос на вредноста на нивните ваучери“, вели правникот Ендрју Пол. Според адвокатот, авиокомпанијата вршела притисок врз патниците да ги користат нивните ваучери или целосно да се ослободат од кредитот. Со тужбата се бара поврат на сите преостанати кредити и надомест за летовите кога клиентите останале без пари.
Тврдењето отвора прашања за функционалноста и законитоста на патните кредити што се задржуваат на билансите на авиокомпаниите низ светот. „Квантас“ неделава треба да пријави рекорден годишен профит откако побарувачката за патувања скокна по пандемијата.
Компанијата собра околу две милијарди австралиски долари (1,3 милијарда американски) во кредити за патувања поврзани со ковид. Минатиот месец компанијата ги охрабри патниците да ги искористат преостанатите кредити во вредност од 400 милиони австралиски долари, нудејќи двојно повеќе од нормалниот број на поени за лојалност за резервации направени со ваучерите пред крајот на јули.
Во својата изјава, „Квантас“ посочи дека повеќето клиенти со кредити од ерата на ковид може да си ги вратат парите и вредноста на овие рефундации надминала милијарда австралиски долари. „’Квантас’ има една од најфлексибилните кредитни политики за ковид од која било авиокомпанија, вклучувајќи и меѓу нашите глобални конкуренти, и трипати ги продолживме датумите на истекување“, се наведува во соопштението.
.webp){kind=icon}
