„Шел“ (Shell Plc) одлучи да продолжи со изградбата на најголемата европска фабрика која ќе произведува водород од обновлива енергија, во потег кој ја отсликува сигурноста на овој нафтен гигант дека ваквото гориво може да биде клучно за намалување на емисиите на јаглерод.
Фабриката Holland Hydrogen I ќе вклучува 200 мегавати електролизери, напојувани од фарма со ветерници во близина на брегот на Холандија, се вели во соопштение на компанијата. Ова е капацитет кој е 10 пати поголем од најголемиот за зелен водород кој во моментот постои во Европа. „Шел“ не ја открива вредноста на инвестицијата.
Зелениот водород е клучен дел од плановите на Европа за намалување на емисиите и зависноста од увезениот природен гас од Русија. Гасот со чисто согорување може да се користи за замена на фосилните горива во индустриските процеси како што се производство на хемикалии, тешкиот транспорт и производството на електрична енергија.
„Обновливиот водород ќе игра клучна улога во енергетскиот систем на иднината и овој проект е важен чекор во овозможувањето водородот да го исполни тој потенцијал“, вели Ана Масколо, извршна потпретседателка за нови енергетски решенија во „Шел“.
Додека Европа има големи планови за зелениот водород, најголем дел од производството моментно е на мало, експериментално ниво. „Ибердрола“ (Iberdrola SA) располага со капацитет кој сега се смета за најголем за зелен водород во Европа и е лоциран во Шпанија, со капацитет од 20 мегавати.
Откако проектот ќе биде завршен во 2025 година, „Шел“ ќе користи приближно 60.000 килограми зелен водород произведени на дневно ниво за снабдување на Shell Energy and Chemicals Park во Ротердам. Тој објект тековно користи водород произведен со употреба на фосилни горива. Користењето на зелената алтернатива ќе ги намали вкупните емисии.
.webp){kind=icon}
