Twitter ангажира тим од правни експерти за спојување на компании од Wachtell, Lipton, Rosen & Katz за да поднесат тужба против Илон Маск бидејќи тој се откажа од преземањето на компанијата, вредно 44 милијарди долари, велат извори запознаени со ситуацијата.
По затворањето на берзата во петокот, Маск објави дека планира да се откаже од својата понуда за преземање на Twitter, тврдејќи дека компанијата погрешно ги претставува податоците за корисниците. Претседателот на Управниот одбор на Twitter, Брет Тејлор, најави дека договорот ќе биде спроведен преку долги и напорни судски спорови.
На затворањето на берзата, акциите на Twitter паднаа за 5,1 отсто, на 36,81 долари, а по тргувањето дополнително се намалија за 4,8 отсто, на 35 долари. За потсетување, Маск понуди 54,20 долари по акција.
Компанијата за социјални мрежи планира да поднесе тужба на почетокот на неделава, според извори кои побарале да останат анонимни. Со ангажирањето на Wachtell и партнерите, Twitter има на своја страна адвокати како Бил Савит и Лео Стрин, кои биле канцелари во судот во Делавер каде што ќе се одржи сослушувањето.
Маск ја ангажира адвокатската фирма Quinn Emanuel Urquhart & Sullivan. Во 2019 година успешно го бранеа од тужба за клевета, а го застапуваат и во актуелната тужба поднесена од акционер на Tesla поради неуспешен обид за приватизација на компанијата во 2018 година.
Правните застапници на Twitter одбиja да коментираaт, а Quinn Emanuel не одговори на прашањата. Тие одбија да изнесат став за ситуацијата со Twitter, а коментар немаше ниту од кабинетот на Маск.
Делавер е дом на повеќе од половина од американските јавни компании, вклучително и Twitter и повеќе од 60 отсто од компаниите на листата Fortune 500. Судиите таму, експерти за деловно право, судат без порота и не можат да изречат казна. Врз основа на претходните правни битки за спојување, обидите за раскинување на договорите се решаваат во рок од неколку месеци и често завршуваат со спогодби.
Судот ќе треба да одлучи и дали Маск треба да плати отштета од една милијарда долари за откажување.
Во неделата вечерта Маск на социјалните мрежи на свој начин ги следеше последните случувања, исмејувајќи ја ситуацијата. Со мемиња во кои самиот е главен лик, опиша низа настани - од тоа како му кажале дека не може да го преземе Twitter и дека не може да добие информации за ботовите, па дека потоа ќе мора да го преземе Twitter преку судски спор и конечно дека на суд ќе мора да се објават информациите за ботови на платформата. Секој од овие описи e проследен со слика од неговото насмеано лице како тоа да е добра шега, а не договор вреден десетици милијарди долари.
.webp){kind=icon}
