„Ново Нордиск“ (Novo Nordisk A/S), која се соочува со тесни грла во снабдувањето поради големата побарувачка за нејзините популарни лекови за слабеење, ќе инвестира 2,1 милијарди евра (2,3 милијарди долари) за да го прошири своето производство во Франција.
Францускиот претседател Емануел Макрон официјално ќе ја објави инвестицијата в четврток, на локацијата на компанијата во Шартр, југозападно од Париз, соопшти неговиот кабинет. Помошникот на Макрон не одговори веднаш на прашањето дали сумата вклучува и јавни субвенции.
Данската компанија работи на зајакнување на производството на два сестрински лека, „вегови“ за слабеење и „оземпик“ за дијабетес, како и на нивните пенкала за инјектирање, во услови на зголемена побарувачка. Лудилото околу лековите, поддржано од познати личности и претприемачи, вклучувајќи го и Илон Маск, ја претвори „Ново Нордиск“ во највредна компанија во Европа, зголемувајќи ги нејзините акции за околу половина годинава.
Инвестицијата ќе донесе повеќе од 500 работни места, соопшти кабинетот на Макрон.
Има недостиг од двата лека за инјектирање, кои ја содржат активната состојка семаглутид што го имитира дејството на цревниот хормон, правејќи луѓето да се чувствуваат сито.
Bloomberg Mercury
Се покажа дека „вегови“ им помага на корисниците да намалат околу 15 отсто од нивната телесна тежина во просек, а неодамнешните студии покажаа и придобивки за срцето. „Ново Нордиск“ досега го има воведено лекот само во неколку земји. Пристапот во Франција е ограничен на пациенти со прекумерна тежина со друг фактор на ризик, како што се срцеви заболувања или апнеја при спиење.
Поттикнувањето пресврт во индустрискиот пад на земјата беше една од клучните економски цели на Макрон и тој претстави низа мерки годинава во обид да го стори тоа, вклучувајќи и проширена употреба на даночни кредити за инвестиции и рационализирање на процедурите за отворање нови фабрики.
Атрактивноста на Франција како место за инвестирање може да добие поттик и од судската одлука во Германија минатата недела. Владата на таа земја беше принудена да воведе вонредно замрзнување на трошоците бидејќи ги проценува импликациите од одлуката на судот дека околу 60 милијарди евра не може да се префрлат во фонд наменет за поддршка на низа индустриски проекти.
Данскиот производител на лекови е во трка за изградба на фабрики и производствени линии додека конкуренцијата се интензивира на пазарот за слабеење, кој се проценува дека ќе достигне 100 милијарди долари до крајот на деценијата. Месецов „Ново Нордиск“ го претстави планот за инвестирање над шест милијарди долари за изградба на производствен капацитет од 170.000 квадратни метри во Данска.
Вестите од четвртокот се дополнување на инвестицијата од 130 милиони евра во проширување на капацитетот во Шартр, која „Ново Нордиск“ ја објави во јануари. Компанијата моментално вработува 1.450 луѓе и произведува инсулин што го користат повеќе од осум милиони пациенти во светот.
.webp){kind=icon}
