.webp){kind=icon}
Шведскиот трговец на мало Hennes & Mauritz AB (H&M) ќе почне да ги прекинува своите операции во Русија, откако ги запре сите продажби во земјата во март, по рускиот напад врз Украина.
Компанијата со седиште во Стокхолм очекува во процесот да пријави трошоци од 2 милијарди круни (190 милиони долари), од кои околу милијарда ќе имаат влијание врз готовинскиот тек, се вели во соопштението. Групата планира повторно да ги отвори физичките продавници во Русија на ограничен временски период за да ги продаде преостанатите залихи.
„По внимателно разгледување, сметаме дека со оглед на тековната ситуација е невозможно да го продолжиме нашиот бизнис во Русија“, изјави главната извршна директорка, Хелена Хелмерсон.
Делувањето на H&M во Русија сочинуваше околу 4 отсто од нејзините 199 милијарди круни во продажба во текот на минатата финансиска година. Компанијата работи во земјата од 2009 година. Во март, шефот за односи со инвеститори на H&M, Нилс Винге, рече дека не е тајна оти Русија била еден од најважните пазари за раст на компанијата.
Суспензијата на продажбите во Русија, Белорусија и Украина заедно придонесе за 5 процентни поени во очекуваниот пад на приходите од 6 отсто минатиот месец во споредба со истиот период пред една година, според најновиот квартален извештај на компанијата.
„Одлуката на H&M може да изврши притисок врз конкурентот Inditex, па дури и врз трговците со храна Metro и Auchan да размислат за сопствен излез“, вели аналитичарот на Bloomberg Intelligence, Чарлс Ален во коментар. „Излезот ја нагласува важноста за изградба на Латинска Америка како алтернативен пат кон раст, додека Кина, исто така, останува тешка за компанијата“, додава тој.
Акциите на H&M паднаа за 1,2 отсто кога утрово започна тргувањето во шведскиот главен град.
