Врвен републикански пратеник рече дека следната недела во Претставничкиот дом ќе побара гласање за легислатива што ќе го принуди кинескиот сопственик на Тикток (TikTok) да ја продаде апликацијата или ќе се соочи со забрана од САД, давајќи им нов моментум на напорите на Конгресот да го ограничи влијанието на Пекинг врз платформата за споделување на кратки видеа.
Легислативата, која во четвртокот беше поддржана од клучен комитет, ќе им забрани на давателите на интернет услуги и продавниците за апликации, како што се оние што ги водат „Епл“ (Apple) и „Гугл“ (Google), да ја нудат апликацијата, освен ако кинескиот сопственик „Бајт денс“ (ByteDance) не го продаде Тикток во рок од шест месеци.
Откако Комитетот за енергетика и трговија гласаше со 50 спрема нула за одобрување на нацрт-законот, пратеникот Стив Скализ од Луизијана, вториот републиканец во Претставничкиот дом, рече дека ќе го изнесе на гласање.
Скализ во објава на Х, порано познат како Твитер, посочи дека мерката ќе го принуди Тикток да ги „прекине врските со Кинеската комунистичка партија“. Претходните законодавни обиди да се ограничи апликацијата на национално ниво не успеаја, а оваа сепак ќе мора да ги мине законодавните пречки во Домот и Сенатот, каде што нема спонзори. Но, пратениците велат дека овој најнов напор е резултат на повеќемесечна подготовка, делумно поттикната од обновените безбедносни грижи дека Кина ги надгледува Американците.
Водачот на мнозинството во Сенатот, Чак Шумер, во изјава рече дека „разговара со своите претседавачи и пратеничката група за нацрт-законот. „Ќе ги слушнам нивните ставови за законот и ќе го одредам најдобриот начин на дејствување“, поочи тој. Тикток во последен момент покрена напори да се спротивстави на нацрт-законот, кој беше покренат во вторникот, повикувајќи ги своите корисници да се јават во конгресните канцеларии за да протестираат против законот преку порака што ги поздрави при отворање на апликацијата.
Чак Шумер
Bloomberg
Конгресните канцеларии биле преплавени со повици, што го навлече гневот на претседателот на Комитетот за Кина, Мајк Галагер. Пратениците рекоа дека „нивните телефони ѕвонат цела ноќ“, изјави Галагер, републиканец од Висконсин, за новинарите пред Капитол во четвртокот. „Тактиките за заплашување и дезинформациите мора да престанат“, рече тој подоцна во видеопорака.
На крајот, кампањата се покажа неуспешна, барем во спречувањето на пратениците да го направат првиот чекор кон носењето на законот. И демократите и републиканците долго време изразуваат загриженост за националната безбедност во однос на поврзаноста на Тикток со „Бајт денс“, наведувајќи го ризикот дека кинеската влада собира лични податоци од Американците и шири пропаганда на апликацијата.
Платформата е под ревизија во контекст на националната безбедност уште од администрацијата на Трамп. Администрацијата на Бајден сигнализираше претпазлива поддршка за предлогот, при што прес-секретарката на Белата куќа, Карин Жан-Пјер, во средата рече „сакаме да го реализираме овој закон“. Тикток постојано негира дека споделувал или ќе сподели какви било податоци од американските корисници со Пекинг и се обиде да ја ублажи загриженоста на САД со трошење на повеќе од 1,5 милијарди долари за да ги изолира своите операции во САД, а се согласи на надзор и од американскиот партнер „Оракл“ (Oracle).
Bloomberg Mercury
Тикток во соопштение посочи дека легислативата ќе ги погази правата на слободата на говорот од Првиот амандман и ќе лиши милиони мали бизниси од платформата од која зависат. Апликацијата веќе станува важна точка за разговор во годината на претседателски избори. Кампањата за реизбор на претседателот Џо Бајден дури создаде налог на апликацијата пред гласањето во ноември.
Повеќе од 170 милиони Американци ја прелистуваат апликацијата секој месец, што ги прави нејзините корисници важен ресурс. По гласањето, од Тикток во објава на X посочија дека новиот закон „има однапред одреден исход - целосна забрана за Тикток во САД“.
Одвојувањето на Тикток од неговиот кинески сопственик би било комплицирана, можеби и невозможна операција. „Бајт денс“ ја разви технологијата која ги покрена виралните кратки видео содржини, а неговите инженери поддржуваат идентична услуга за кинескиот пазар наречена Доујин (Douyin).
Доколку американските законодавци ги принудат да го сторат тоа, „Бајт денс“ би можел да се обиде да ги одвои операциите на Тикток во САД, додека ги одржува своите операции во остатокот од светот. Бизнисот на Тикток во САД би можел да се процени на 40 до 50 милијарди долари, според проценката од минатата година на аналитичарите на „Блумберг интелиџенс“, Мандип Синг и Демијан Рејмерц.
Сепак, секоја директна продажба се соочува со силно противење од Пекинг, кој би можел да се обиде да блокира таков договор. Кинеската влада беше чувствителна на протекување податоци во странство, особено кога станува збор за гигантски интернет компании како што е „Бајт денс“. Под притисок на администрацијата на Трамп, „Бајт денс“ мина низ обемни преговори во 2020 година за да ги прекине своите операции во САД и да ги пренесе на „Оракл“ или „Мајкрософт“ (Microsoft). Иако кинеската компанија го избра „Оракл“, договорот на крајот беше откажан бидејќи администрацијата на Бајден ја презеде власта и одлучи да не ја воведе забраната.
.webp){kind=icon}
