„Ејч енд ем“ (Hennes & Mauritz / H&M) забележа повисока оперативна маржа во првиот квартал бидејќи шведскиот специјалист за брза мода се фокусира на зајакнување на профитабилноста.
Оперативната добивка во првиот квартал изнесуваше 2,08 милијарди шведски круни (196 милиони долари), надминувајќи ги очекувањата на аналитичарите од 1,3 милијарда круни, при што оперативната маржа се зголеми на 3,9 отсто од 1,3 отсто претходната година.
Извештајот од средата е прв за новиот извршен директор Даниел Ервер, кој ја презеде функцијата откако Хелена Хелмерсон ненадејно си замина, по извештајот на компанијата за четвртиот квартал во јануари. Нејзиното заминување нанесе удар врз акциите.
Сега останува на Ервер да го забрза пресвртот на „Ејч енд ем“ бидејќи компанијата се бори да ги намали екстремно високите нивоа на резерви, во време кога трпи порази од најголемиот ривал „Зара“ (Zara), која е во сопственост на „Индитекс“ (Inditex), како и од новата онлајн конкуренција, како што е кинеската „Шејн“ (Shein).
„Целосно сме фокусирани на поттикнување на профитабилен раст понатаму“, посочи Ервер во извештајот, припишувајќи им ги подобрените перформанси и профитабилноста на компанијата на „постојаната контрола на трошоците, подобрената прецизност на колекциите и блиската соработка со доставувачите“.
Неверојатно високите влезни и административни трошоци, заедно со тешкотиите со резервите, се меѓу најголемите предизвици на Ервер во 2024 година, бидејќи компанијата се обидува да достигне двоцифрена маржа ЕБИТ до крајот на годината.
Можеби ќе ѝ биде тешко да го надмине она што се покажа како проблем во првата половина на 2023 година, во која потрошувачите се вратија во продавниците со намалувањето на инфлацијата, што доведе до пораст на акциите од 57 проценти во текот на годината, меѓу најдобрите во Европа.
Сепак, почетокот на 2024 година не беше идиличен, со пад на акциите за околу 13 отсто до крајот на март.
Претходничката на Ервер, Хелмерсон, ја напушти компанијата што ја водеше четири години, за време на кои таа се бореше со влијанието на пандемијата, соочена со критики за бизнис-моделот на групацијата за брза мода и нејзиното влијание врз животната средина.
Некои инвеститори првично изразија скептицизам за номинацијата на Ервер, при што аналитичарите се прашуваа дали 42-годишникот, кој почнал да работи во „Ејч енд ем“ како летен практикант во 2005 година, има моќ да ја промени компанијата.
.webp){kind=icon}
