.webp){kind=icon}
Загуба од 90 илјади евра во првите три месеци годинава оствари домашното друштво „Скопски Пазар“ АД Скопје, соопшти преку Македонска берза.
Во истиот период лани, компанијата имала добивка од безмалку 765 илјади евра, што значи пад на профитот од речиси 112 проценти.
Од билансот на успех се гледа дека компанијата има пад на оперативните приходи од 41 процент, додека приходите од продажба се намалиле за 13 отсто. Вкупните приходи изнесуваат 66.198 илјади денари (еден милион евра). Резултатот е остварен во услови на раст на расходите за 11 отсто и во првиоте три месеци годинава изнесуваат 71.757 илјади денари (1,17 милиони евра).
Годишното собрание на компанијата е закажано за 15 мај, а на него треба да се дискутира и за распределбата на ланската добивка. Во образложението на финансискиот резултат за првиот квартал друштвото наведува дека „последователното мерење на градежните објекти (магацински и деловен простор) кои се издаваат под оперативен наем, кои се иницијално признаени по моделот на објективна вредност, се врши со повторна проценка на нивната објективна вредност на секој датум на билансирање. Добивката или загубата која произлегува од промената на објективната вредност се признава во добивката или загубата во периодот во кој настанала согласно МСС 40“.
Соопштуваат дека годинава ќе продолжат планираните инвестиции во објектите со кои стопанисува Друштвото.
Скопски пазар управува со 12 зелени пазари и деловен простор наменет за издавање со вкупна површина од околу 58.000 квадратни метри.
Во текот 2021 година „ЗСФ ком“ и прилепската фирма „Современ дом“ ја презедоа дотогаш семејната компанија и моментно се најголеми акционери со по 38,24 отсто од обичните акции на друштвото.
Вкупната добивка на друштвото минатата година беше безмалку два милиони евра.
