.webp){kind=icon}
Кина е подготвена да изрече рекордна казна за „Прајсвотерхаускуперс“ - ПвЦ (PricewaterhouseCoopers LLP - PwC) и да суспендира некои од локалните операции на глобалниот ревизор поради неговата улога во еден од најголемите случаи на наводна финансиска измама во земјата, според луѓе запознаени со ова прашање.
Министерството за финансии веќе неделава може да ги објави казните за ПвЦ, а во врска со нејзината ревизорска работа за „Евергранд“ (China Evergrande Group), рекоа изворите, барајќи да не бидат идентификувани бидејќи станува збор за приватна работа. ПвЦ се соочува со казна од најмалку милијарда јуани (138 милиони долари), велат упатените. Тоа би ја надминало претходната рекордна казна за една сметководствена фирма, 212 милиони јуани доделени на „Делојт“ (Deloitte Touche Tohmatsu Ltd.) во 2023 година.
Некои од казните би можеле да вклучуваат и запирање на операциите во некои од канцелариите на ПвЦ, велат изворите, додавајќи дека одлуката не е конечна и дека одредени детали би можеле да бидат предмет на промена.
Кинеското министерство за финансии и ПвЦ не одговорија веднаш на барањата за коментари упатени од „Блумберг“ (Bloomberg).
ПвЦ беше во центарот на вниманието откако Кина започна една од најголемите истраги за финансиска измама во историјата во која беше вклучен изведувачот „Евергранд“. Властите претходно годинава изрекоа казна од 4,18 милијарди јуани против некогашната компанија за недвижности и рекоа дека главната единица на компанијата, Хенгда (Hengda) го преценила својот приход за 564 милијарди јуани во двете години до 2020 година.
Казната ќе му наштети на угледот на ПвЦ и „негативно ќе влијае на довербата на јавноста во сметководството“, рече Пингјанг Гао, професор по сметководство и право од бизнис-школата ХКУ (HKU). „Не би бил изненаден ако уделот на ревизорскиот пазар на овие глобални франшизи во Кина се намали“.
ПвЦ веќе изгуби неколку кинески клиенти само во мај, зголемувајќи го списокот од над десетина фирми за кои ги прекина сметководствените услуги во земјата во последните две години. Меѓу нив беа „Таипинг“ (China Taiping Insurance Holdings Co.), „Мерчантс бенк“ (China Merchants Bank Co.) и „Пиполс иншуранс“ (People's Insurance Company (Group) of China Ltd).
Казните следуваат откако претседателот Шји Џјинпинг го зголеми фокусот на справувањето со финансиските ризици и криминалот за да ја стабилизира втората по големина економија во светот. На состанокот на Политбирото во понеделникот, Шји им наложи на финансиските регулатори и локалните власти да спроведат нови правила и да се погрижат финансискиот надзор да има „заби“.
Повеќе детали прочитајте на следниот ЛИНК.
