„Пепси“ даде благослов „Карлсберг“ да го преземе „Бритвик“

„Карлсберг“ (Carlsberg AS) постигна договор со американски „Пепси ко“ (PepsiCo Inc) за потенцијално преземање на британскиот производител на безалкохолни пијалаци „Бритвик“ (Britvic Plc.) вредно 3,1 милијарди фунти (3,9 милијарди долари).

„Бритвик“, кој ги произведува брендовите како што се „Фрут шут“ (Fruit Shoot) и J2O, ги полни и пакува шишињата на „Пепси“ во Велика Британија. Американската компанија за безалкохолни пијалаци се откажа од клаузулата за промена на контролата што ја има во договорот со „Бритвик“, што потенцијално го олеснува патот за преземање.

Од „Карлсберг“ во петокот соопштија дека ги разгледуваат своите опции откако „Бритвик“ одби две понуди за преземање, последната од 1.250 пени по акција, со образложение дека тие значително ги потценуваат компанијата и нејзините перспективи.

Акциите на „Бритвик“ пораснаа дури за 10 отсто, до над 1.200 пени во понеделникот, на почетокот на тргувањето во Лондон.

Договорот на „Пепси ко“ со „Бритвик“ вклучува клаузула за промена на контролата, која вообичаено дозволува таквиот договор да биде раскинат доколку дојде до промена на сопственоста. Тоа би претставувало дополнителна компликација за „Карлсберг“ или кој било купувач.

Данскиот производител на пиво соопшти во петокот дека неговиот интерес за „Бритвик“ е во согласност со неговата стратегија, објавена во февруари, која вклучува проширување на палетата и на други производи освен пивото. Брендовите како јаболковината (англ. cider) „сомерсби“ и „гараж хард“ (Garage hard seltzers) сочинуваат 2 отсто од производството.

Големите производители на пиво се соочуваат со долгорочен пад на побарувачката, бидејќи тие што пијат се префрлаат на пожестоки алкохолни пијалаци или избираат да пијат помалку алкохол.

Акциите на „Карлсберг“ паднаа за повеќе од 10 отсто откако беше потврден неговиот интерес за понуда во петокот. Оттаму рекоа дека ги разгледуваат следните чекори. Тие имаат рок до 19 јули да дадат официјална понуда или да заминат според правилата за преземање во Обединетото Кралство.

Во моментов нема коментари за веста. Биди прв да коментира...

Остави коментар