„Мермерен Комбинат“ АД Прилеп за периодот од 1 јануари до 30 јуни 2022 година оствари приходи од продажба во износ од 878.923.000 денари што претставува зголемување за 5,7 проценти споредено со истиот период од изминатата година, соопшти компанијата преку Македонската берза.
Остварената оперативна добивка за периодот е во износ од 435.591.000 денари. Споредено со остварената оперативна добивка за истиот период во 2021 година во износ од 455.693.000 денари има намалување од 4,41 проценти.
ЕБИТДА за периодот од 1 јануари до 30 јуни 2022 година изнесува 504.684.000 денари наспроти остварениот износ од 527.381.000 денари истиот период од изминатата година, или намалување за 4,30 проценти.
Крајниот резултат по оданочување за првиот семестар од 2022 година е позитивен и изнесува 393.428.000 денари наспроти остварената добивка за истиот период од минатата година од 412.267.000 денари и покажува намалување од 4,57 проценти.
Оперативните расходи изнесуваат 441.627.000 денари и се повисоки за 9,10 проценти во однос на истиот период од минатата година.
„Евидентирано е зголемување на трошоците за материјали и суровини за 25,34 проценти, а на расходите за вработени намалување за 8,53 проценти. Трошоците за надворешни услуги се зголемени за 28,26 проценти. Трошоците за амортизација изнесуваат 66.821.000 денари и тие се пониски за 3,72 проценти во однос на минатата година“, информираат од компанијата.
Оттаму додаваат дека работењето на друштвото се одвива според планот, меѓутоа има намалување на профитот во голем степен поради зголемената цена на чинење на енергијата.
„Ефектите од вториот семестар од годината тешко се квантификуваат, со оглед на непредвидливата природа на цената на чинење на енергијата“, укажуваат од компанијата.
.webp){kind=icon}
