„Бетон“ тужи за проектите од „Скопје 2014“

Градежната компанија „Бетон“, една од најголемите во земјава која беше носечка во владиниот проект „Скопје 2014“, сега е на мака да си ги наплати побарувањата за изградените барокни згради и фасади. Компанијата прикажа загуба од речиси 4 милиони евра и во првото полугодие годинава, а како причина за намалените приходи компанијата сега ги наведува раскинатите договори со Јавното претпријатие за државни патишта (ЈПДП) и со Народната банка. Македонската редакција на Блумберг Адриа веќе пишуваше за договорот со Народната банка за кои потврдија и оттаму. Сега „Бетон“ најавува и тужби.

„Приходната страна на компанијата значително е намалена во првата половина на 2022 година, што се должи на раскинатите договори со ЈПДП и НБРМ. Компанијата превзема соодветни чекори за оспорување на едностраното раскинување на договорите, особено во услови кога инвеститорите немаа поставено основи и соодветни проекти за непречена и навремена реализација на проектите согласно договорите, стои во образложението.

Загубата компанијата ја правда и со зголемените трошоци на инпутите за работа, но во објавата се наведува и дека успеале да ја зголемат наплатата на старите долгови. Како пример се наведува долгот за изградбата на црквата во центарот на градот Св. Константин и Елена. Сепак „Бетон“ објавува дека води судски спор за изградбата на фасадата на ЕВН и за проекти на Министерството за култура.

Од „Бетон“ велат и дека потпишале договор со ТИРЗ вреден 100 милиони денари за кои очекуваат да почне со реализација од септември годинава. Инаку од компанијата тврдат и дека не може да си ослободат 16 милиони евра, пари кои им биле дадени како гаранција за изградба на автопатот Миладиновци-Штип, за кој Синохидро беше изведувач, а скопската компанија подизведувач.

Блумберг Адриа пишуваше дека договорот за изградба на новата зграда на НБРМ е раскинат на 22 јули годинава. Во сега веќе далечната 2016 година „Бетон“ беше избран за најповолен понудувач и ја доби работата, да ја изгради новата зграда на Народната банка во центарот на градот. Објектот се наоѓа на  на улицата „Филип Втори“, веднаш зад новата зграда на Министерството за надворешни работи. Градежното земјиште ѝ е доделено на НБРМ на трајно користење од страна на Владата на седницата одржана на 3 јануари 2013 година. Тој договор е вреден 24 милиони евра и се однесува на сите работи поврзани со градежените активности на новата зграда. Со „Бетон“ е склучен и друг договор кој се однесува на заштита на градежна јама за изградба на зградата во вкупна вредност од 200 илјади евра.

Годинава ЈПДП исто така го раскина договорот со „Бетон“ за изведување на реконструкцијата на делницата Петровец - Катланово на автопатот „Пријателство“ на потегот Скопје - Велес. Вредноста на овој договор е 7,2 милиони евра.

Во моментов нема коментари за веста. Биди прв да коментира...

Остави коментар