ЛВМХ влегува во светот на Формула 1: потпишан е милијардерски спонзорски договор

ЛВМХ (LVMH-Moët Hennessy Louis Vuitton) и Формула 1 потпишаа десетгодишен договор вреден повеќе од една милијарда долари. Соработката ќе почне во 2025 година и ги вклучува брендови како „Луј Витон“ (Louis Vuitton), „Моет Хенеси“ (Moët Hennessy) и „ТАГ Хауер“ (TAG Heuer), кои ќе бидат клучен дел од глобалната промоција преку овој престижен спорт. Францускиот гигант за луксузни производи и неговиот бренд „ТАГ Хауер“ го презедоа спонзорскиот договор од „Ролекс“ (Rolex) како официјален партнер за мерење на времето. Според извештајот на „Блумберг“, 10-годишниот договор може да вреди повеќе од една милијарда долари со годишните спонзорски надоместоци кои надминуваат 100 милиони долари.

Договорот дополнително ја отсликува амбицијата на ЛВМХ да ја искористи растечката гледаност на спортските настани, што особено дојде до израз во врска со премиум спонзорството на Олимписките игри. Според многумина ЛВМХ беше победник во маркетиншката трка уште пред да започне Олимпијадата. И како што се вели, некој ќе победи, друг ќе изгуби.

А во спонзорската игра во Формула 1 загубата секако ја претрпе „Ролекс“ (Rolex SA), водечкиот швајцарски бренд за часовници, кој е официјален партнер во Формула 1 од 2013 година.

За „ТАГ Хауер“, кој, како што претходно објави „Блумберг Адрија“, е ветеран во трките, овој договор е логично продолжување на неговата историска поврзаност со мото спортовите.

 

Часовник TAG Heuer International SA limited edition Indy 500 Formula 1 Chronograph Фото: Victor J. Blue/Bloomberg

 

Како што известува колумнистката на „Блумберг“, Андреа Фелстед, „тврдиот луксуз“ (Часовници и накит) е една од ретките области каде што ЛВМХ има простор да се прошири. Интересно е тоа што тројца од синовите на Бернард Арно, главен извршен директор на ЛВМХ, играат клучни улоги во оваа област: Александар како извршен потпретседател за производи и комуникации во „Тифани“ (Tiffany & Co.), Фредерик како извршен директор на часовниците на ЛВМХ, кој инаку претходно го водеше „ТАГ Хауер“ и Жан, директор за часовници во Луј Витон. Оваа динамика укажува на тоа дека сегментот на часовници и накит ќе стане уште поважен во иднина.

Најспомнувани брендови на ЛВМХ на социјални мрежи Bloomberg Mercury

 

Фелстед исто така нагласува дека спонзорскиот договор со Формула 1 доаѓа во клучен момент за ЛВМХ. Побарувачката за луксузни стоки во Кина е ослабена, а американските потрошувачи станаа презаситени со луксузни стоки по период на прекумерно купување помеѓу 2020 и 2023 година. Големите поскапувања не помогнаа, па аналитичарите предвидуваат стагнација во продажбата на модните и кожните производи на ЛВМХ во третиот квартал од оваа година. Цените на акциите на луксузните брендови се во пад, за што веќе пишувавме претходно.

Трките во Формула 1 имаат голема гледаност, а нивната популарност експлодираше, особено во САД, откако „Либерти медија“ (Liberty Media) ја презеде контролата во 2017 година, благодарение на проширувањето на трките и серијата на „Нетфликс“ (Netflix),  „Вози да преживееш“ (Drive to Survive). Оваа популарност привлече помлада, технолошки пописмена и разновидна публика, а уличната мода ги воведе во светот на европскиот луксуз. Како што опаѓа интересот за тој сегмент на пазарот, спортовите како Формула 1 може да ја преземат улогата на главен канал за промоција на луксузни брендови, а за ЛВМХ, покрај „ТАГ Хауер“, тука е и „Луј Витон“, кој ќе прави кутии за трофеи, а шампионите, по традиција, ќе се прскаат со шишиња шампањ „Моет и Шандон“ (Moet & Chandon).