ХСБЦ (HSBC Holdings Plc) објави широка реорганизација на различни деловни сектори и географски подрачја, додека новоименуваниот главен извршен директор Жорж Елехдери започнува со амбициозни намалувања на трошоците во банкарскиот гигант.
Банката ќе ги комбинира своите глобални комерцијални и институционални банкарски операции под водство на Мајкл Робертс, според изјавата. Исто така, ќе создаде нова меѓународна бизнис-единица за богатство и премиер-банкарство, која ќе ја надгледува Бери О’Бирн.
Како дел од новата географска поставеност, ќе има источна регионална единица, која ги вклучува Азија-Пацифик и Блискиот Исток, и западен пазар, кој вклучува банки во Британија, Европа и Америка. Исто така, Хонгконг и Обединетото Кралство ќе бидат самостојни единици.
„Новата структура ќе резултира со поедноставна, подинамична и агилна организација додека се фокусираме на извршување на нашите стратегиски приоритети, кои остануваат непроменети“, наведе Елехдери во изјавата.
Овие промени ќе го намалат бројот на извршни директори што седат во новоименуваниот оперативен комитет од 18 на 12.
Акциите паднаа за 0,3 отсто до 13.46 часот во Хонгконг.
ХСБЦ исто така ја именува Пам Каур за главна финансиска директорка, со што таа стана првата жена финансиски директор во 159-годишната историја на компанијата. Каур се приклучи во 2013 година како шефица за ревизија пред да ги надгледува ризикот и усогласеноста. „Таа е високопочитувана и добро позната на одборот и беше едногласен избор“, истакна претседателот Марк Такер во изјавата.
Пам Каур
HSBC
Некои клучни извршни директори заминуваат како дел од реорганизацијата. Меѓу нив се Стивен Мос, кој ги води Блискиот Исток и Северна Африка, заедно со шефот на Европа - Колин Бел. Грег Гајет, сегашниот извршен директор за глобално банкарство и пазари, беше именуван за претседател на групата за стратегиски клиенти, новосоздадена позиција.
Додека централните банки низ светот почнуваат да ги намалуваат каматните стапки, Елехдери е под притисок да ги намали трошоците за да ги заштити маргините на фирмата. Тој побара од вработените да бидат повнимателни со своите трошоци и постави нови ограничувања за патувањата на банкарите.
Новиот извршен директор бара начин да намали 2 милијарди долари во трошоци за да го задржи соодносот на ефикасност на банката, клучна мерка за профитите што покажува колку чини да се произведе долар приход, според „Блумберг интелиџенс“ (Bloomberg Intelligence).
Неговото именување, кое стапи во сила минатиот месец, означува брз подем за банкарот роден во Либан, образован во Франција, чиј предизвик сега е да покаже дека може понатаму да ја развива најголемата банка во Европа.
Со овие потези, ХСБЦ ги следи стапките на „Ситигруп“ (Citigroup Inc.), која исто така неодамна ги спои своите секторски групи.
Спојувањето на комерцијалните и институционалните банкарски дивизии, кои го вклучуваат нејзиниот инвестициски банкарски сектор, ја завршува долгогодишна дебата во ХСБЦ за тоа како најдобро да се управуваат двата од нејзините најголеми и најважни бизниси. Предлогот се соочуваше со внатрешен отпор во минатото и поранешниот извршен директор на ХСБЦ, Ноел Квин, беше против идејата, објави претходно „Блумберг“.
Источниот регион ќе го спои азискиот бизнис со Блискиот Исток, а ќе го водат Дејвид Лиао и Сурендра Роша. Робертс ќе го надгледува западниот регион.
„Јас гледав на глобалните операции на ХСБЦ како на премногу сложени и премногу географски раширени“, рече Мајкл Макдад, стратегиски аналитичар за капитал на „Морнингстар“ (Morningstar). „Оваа реорганизација за поедноставување на бизнисот и одвојување на Хонгконг и Британија во посебни бизниси треба да биде позитивна. Исто така може да помогне да се адресира загриженоста на акционерите во Азија, кои пред неколку години тврдеа дека таквото одвојување може да ги подобри приносите“.
.webp){kind=icon}
