Лондонскиот аеродром „Хитроу“ денеска ќе биде затворен поради прекин на струја предизвикан од пожар во блиската трафостаница. Прекинот на летовите на еден од најпрометните светски аеродроми ќе ги наруши плановите за стотици илјади патници.
Пожарот се случил во текот на ноќта во трафостаница во Хејс, северно од „Хитроу“, и голем број пожарникари се борат со пламенот. Од „Хитроу“ во изјава порачаа дека нарушувањата во сообраќајот ќе продолжат „во текот на следните денови и патниците не треба да одат на аеродромот под никакви услови“.
На „Хитроу“, главниот аеродром на авиопревозници како „Бритиш ервејс“ (British Airways) и „Вирџин Атлантик“ (Virgin Atlantic), дневно пристигнуваат и поаѓаат повеќе од 1.400 лета и 200.000 патници. Околу 120 авиони што веќе биле во лет кон „Хитроу“ биле пренасочени на други аеродроми или вратени на нивните појдовни точки, вклучувајќи летови на „Кантас“ (Qantas Airways), „Делта“ (Delta Air Lines) и „Американ ерлајнс“ (American Airlines), покажуваат податоците на платформата за следење летови „Флајтрадар“ (Flightradar24).
Најголемиот аеродром во Велика Британија е важна точка за трансатлантските летови, како и за врски кон Блискиот Исток и Азија. Иако Лондон има и други аеродроми, вклучувајќи ги и „Гетвик“ (Gatwick) и нешто помалиот „Стенстед“ (Stansted) близу Кембриџ, на „Хитроу“ отпаѓа најголемиот дел од поврзаните летови, па прекин на работата на ова ниво е без преседан за тој аеродром.
Авиокомпании како „Емирејтс“ (Emirates), најголемиот светски авиопревозник во меѓународниот патнички сообраќај, кој има десетина лета дневно кон „Хитроу“, порачаа дека откажале некои летови. „Внимателно ја следиме ситуацијата и патниците ќе ги информираме во зависност од нејзиниот развој“, порачаа оттаму.
Ширење на последиците
Од „Бритиш ервејс“, чија главна база се наоѓа на „Хитроу“, порачаа дека прекинот ќе има „значително влијание на нивното работење и на патниците и дека работат што е можно побрзо за да ги информираат за опциите за следните 24 часа и потоа“.
Дури и ако летовите продолжат во текот денот, значителните последици ќе се пренесат многу пошироко и ќе се чувствуваат со денови поради нарушувањата во локациите на авионите и екипажите. Аеродромите понекогаш ги прекинуваат летовите поради временски непогоди или штрајкови, но целосен прекин на работата во текот на целиот ден е многу редок.
„Хитроу“ минатата година беше четвртиот најпрометен аеродром во светот
Bloomberg
На почетокот на 2023 година на аеродромот во Франкфурт - еден од најпрометните во Европа - исто така дојде до сериозни нарушувања по оштетување на интернет-каблите близу железничката локација во северниот дел на тој германски град. Британските аеродроми последните години понекогаш ги прекинуваа летовите поради системите за воздушна контрола, но тоа обично беше само неколку часа.
Видеоснимки од социјалните медиуми покажуваат огромен пламен во трафостаницата, која се наоѓа на околу три километри од аеродромот. Дел од локалното население е евакуиран поради претпазливост, јавија локалните власти.
„Ќе се работи за подолг проблем, а екипажите останаа на пожариштето цела ноќ. Како што се приближува утрото, нарушувањата ќе се прошируваат“, порача Пат Гулбурн, заменик-комесар на Лондонската пожарна служба.
.webp){kind=icon}
