Реперот Кендрик Ламар станува новото заштитно лице на една од најголемите маркетинг-кампањи во историјата на брендот „Гејторејд“ (Gatorade), додека „Пепси“ (PepsiCo Inc.), неговиот сопственик, настојува да ја задржи водечката позиција на сè поконкурентниот пазар на спортски пијалаци.
Кампањата, чија официјална презентација е планирана за петок, го вклучува добитникот на „греми“ и на Пулицеровата награда, како и низа спортисти на „Гејторејд“, како што се Кејтлин Кларк, Лука Дончиќ, Џејсон Тејтум, А’ја Вилсон и Шедур Сандерс. Рекламите ќе бидат премиерно прикажани викендов, за време на доигрувањата во НБА-лигата, а дополнителни промотивни активности се планирани на спортски настани како што се олстар-натпреварот на американската бејзбол-лига и драфтот во НФЛ (NFL).
„Гејторејд“ моментално држи доминантни 62 процента од пазарниот удел во САД, според податоците на БД (Beverage Daily). Меѓутоа, конкуренцијата сè повеќе расте.
Ривалската компанија „Кока-кола“ (Coca-Cola Co.) го зајакнува своето присуство со своите брендови „Бодиармор“ (Bodyarmor) и „Пауерејд“ (Powerade), кои потпишуваат договори со познати спортисти, додека новитети како „Ликвид IV“ (Liquid IV) на компанијата „Унилевер“ (Unilever PLC) и „Прајм“ (Prime), кој го промовира инфлуенсерот Логан Пол, го освојуваат својот дел од пазарот.
„Бодиармор“ во четвртокот ја претстави својата кампања со спортски ѕвезди како Џо Бароу и Конор Мекдејвид.
„Пазарот на спортски пијалаци се наоѓа на крстопат“, вели Ануј Басин, главен директор на брендот „Гејторејд“. Тој е загрижен дека, поради навалата на нови брендови, потрошувачите заборавиле дека спортските пијалаци се научно докажано „супериорно решение“, дизајнирано да ги подобри спортските перформанси.
Станува збор за најголемата кампања со познати личности во историјата на „Гејторејд“, а учеството на Ламар означува првпат еден музичар да биде лице на нивните реклами, истакна Басин. Финансиските детали не се објавени.
Популарноста на Ламар значително порасна во изминатата година благодарение на неколку хита на првото место на топ-листите и настапот на полувремето на Супербоул во февруари. Тој соработуваше со брендови како „Најк“ (Nike) и „Американ експрес“ (American Express), а в сабота ја започнува својата светска концертна турнеја од Минесота.
„Хипхоп-културата е голем дел од спортската култура“, рече Басин. „Со ова сакаме да го промениме начинот на кој комуницираме со генерацијата зед“.
.webp){kind=icon}
Во моментов нема коментари за веста. Биди прв да коментира...