„Дордаш“ (DoorDash Inc.), најголемата услуга за достава на храна во САД, објави прогноза за третото тримесечје што ги надмина очекувањата на Волстрит, што е сигнал дека побарувачката за нејзините услуги останува стабилна и покрај пошироките грижи за потрошувачката.
Компанијата очекува вкупната вредност на нарачките за трите месеци што завршуваат во септември да изнесува помеѓу 24,2 и 24,7 милијарди долари, што е над просечната процена на „Блумберг“, која изнесуваше 23,8 милијарди долари.
Прогнозата беше објавена заедно со резултатите за второто тримесечје, кои беа подобри од очекуваното. Компанијата го припишува овој раст на сè поголемиот број активни корисници и зголемената ангажираност.
„Високото ниво на ангажман на потрошувачите во САД беше евидентно преку многу показатели и присутно кај сите кориснички групи“, соопшти „Дордаш“ во средата.
Компанијата наведе дека бројот на нови корисници се зголемувал секој месец во второто тримесечје, додека корисниците што се активни подолго од шест месеци покажуваат поголема лојалност и сè повеќе нарачуваат од категории надвор од рестораните, како супермаркети и продавници.
Акциите на „Дордаш“ пораснаа за 6,4 отсто во продолженото тргување по објавата.
Финансискиот извештај се совпаѓа со силните резултати што ги објави и одделот за достава на „Убер“ (Uber Technologies Inc.) претходно во средата.
Вкупната вредност на нарачките на „Дордаш“ во второто тримесечје порасна за 23 отсто, достигнувајќи 24,2 милијарди долари, со што ги надмина резултатите на „Убер итс“ (Uber Eats), како и сопствената изведба од претходниот квартал.
Бројот на нарачки ги надмина очекувањата и достигна рекордни 761 милион, при што компанијата посочи дека категоријата ресторани во САД покажала особено силни резултати. Дополнително, „Дордаш“ пријави раст на бројот на претплатници и зголемена активност во рамките на платениот сервис „Дашпас“ (DashPass).
Приспособената добивка за второто тримесечје пред камати, даноци и амортизација изнесувала 655 милиони долари, што ги надминало проекциите.
За тековниот период, компанијата очекува приспособена добивка (ЕБИТДА) во износ од 680 до 780 милиони долари, при што средната вредност ја надминува просечната процена од 718,9 милиони долари.
Во изминатите месеци „Дордаш“ започна со мултимилијардски бран на аквизиции за да ги зајакне другите делови од својот бизнис во САД. Компанијата соопшти дека нејзиното преземање на британската платформа за достава „Деливеру“ (Deliveroo) и понатаму се очекува да биде финализирано во четвртиот квартал, подложно на регулаторно одобрување.
Во меѓувреме, „Дордаш“ ги финализира купувањата на технолошката компанија за рестораните „Севен румс“ (SevenRooms) и на фирмата за огласувачка технологија „Симбиозис“ (Symbiosys), кои, според компанијата, треба да ги засилат понудите за ресторани и рекламните можности за малопродажните партнери.
.webp){kind=icon}
Во моментов нема коментари за веста. Биди прв да коментира...