Стечајот на некогаш најпознатиот трговец со производи за домаќинство во Словенија, „Студио Модерна“, започна на 28 август 2023 година и, според првичниот план, требаше да заврши во рок од 24 месеци, односно деновиве. Но, како што изјави за „Блумберг Адрија“ стечајната управничка Шпела Турк, постапката ќе се одолжи до 2027 година.
Почетоците на „Студио Модерна“ датираат од 1992 година, кога ја основале сопружниците Санди Чешко и Ливија Доланц. Групацијата се прошири на странските пазари, а најголем подем во работењето имаше при преминот во новото илјадалетие. Компанијата беше препознатлива во Хрватска, Унгарија, Словачка, Македонија, Полска, Босна и Херцеговина, Чешка, Русија, Косово, Србија, Црна Гора, Литванија, Латвија, Естонија, Албанија, Романија и Молдавија. Се истакнуваше со голем број брендови, како „Космодиск“, „Дормео“, „Делимано“ и „Ровус“, развивајќи малопродажни канали преку продавници и телемаркетинг познат како „Топ шоп“, а од 2004 година и преку онлајн продажба.
Чешко беше познат словенечки милионер и некогаш прв на листата на „Менaџер“ за најбогати Словенци. Денес го нема на таа листа, а „Студио Модерна“, која некогаш вработуваше речиси 400 луѓе, заврши во стечај.
Од почетниот извештај е видливо дека во постапката за наплата на побарувања се пријавиле 462 доверители, со вкупно околу 33 милиони евра побарувања, додека во стечајната маса имало 5,8 милиони евра имот.
Завршната билансна состојба открила и речиси 11 милиони евра дадени како заеми и камати на холандската компанија „Студио Модерна холдингс инвестментс“ (Studio Moderna Holdings Investments), единствен сопственик на словенечката „Студио Модерна“ од 2006 година. „Според собраните податоци, во 2021 година стечајниот должник ѝ уплатил на таа компанија 9,6 милиони евра по договор за кредит. Во 2022 година бил склучен дополнителен договор за заем, врз чија основа стечајниот должник му уплатил уште 2.211.182 евра. Неисплатениот дел од заемот изнесува вкупно 10.634.727 евра, како и 41.231 евро камата“. Уште на почетокот на стечајот, управничката изразила сомнеж во наплатливоста на побарувањето, наведувајќи дека, според тогаш достапните податоци, заемопримателот нема средства ниту имот за намирување на обврските.
Како што беше наведено, имотот во стечајната маса изнесувал нешто помалку од шест милиони евра, а управничката за поголемиот дел од она што можело да се продаде нашла нови сопственици. Во масата и понатаму останува далеку највредниот имот.
Петтина од износот ќе оди кај доверителот
Станува збор за информациски систем што со години се развивал и ги поврзува сите главни сегменти на компанијата, од продажните до заднинските функции, како набавка, логистика, маркетинг, продажба, аналитика, финансии и сметководство – и чија вредност се проценува на речиси пет милиони евра. Постапката за продажба беше запрена кога доверителот „Топ шоп интернешнл“ (Top Shop International) во стечајната постапка пријави право на издвојување и поднесе тужба, поради што продажбата не можеше да започне. Следуваа одговор на тужбата и преговори, а во јуни годинава беше постигната условна судска спогодба.
Како што објасни Турк за „Блумберг Адрија“, договорено е информацискиот систем да се продаде во целост, а доверителот да добие 20 проценти од постигнатата продажна цена (или речиси еден милион евра доколку се продаде по проценетата вредност), намалено за трошоците за продажба.
„Само така системот може да се продаде како целина“, додаде таа. Доколку би морал да се раздвојува и да се издвојуваат поединечни модули, доверителите би можеле да поминат значително полошо.
Во однос на стечајната постапка, таа појасни дека се во тек „неколку оспорувачки тужби, кои би требало да завршат за половина година, склучени се неколку спогодби со отплата на рати (во тек е и наплатата на побарувања чија реализација според досега склучените спогодби е предвидена до март 2027 година), а клучна е продажбата на системот“. Одлуката за продажба е донесена, па „наесен ќе почнеме со продажбата“. Управничката изрази желба работата да се заврши што е можно побрзо, за да може приоритетните доверители да го добијат својот дел.
Од „Дормео“ – молк
Турк нема конкретни информации за тоа дали има интересенти за информацискиот систем или за износот што би можел да се понуди. Сепак, факт е дека тој за време на стечајната постапка бил изнајмен. Договорот е склучен со компанијата „Валнадин“ (Valnadin), подоцна преименувана во „Дормео“, со која управува Матеја Доланц, сестра на Ливија Доланц, сопругата на Санди Чешко.
Bloomberg
За споредба, во 2022 година, последната целосна деловна година пред стечајот, „Студио Модерна“ оствари 36,5 милиони евра приходи и 1,29 милион евра нето-добивка. Во годината кога беше прогласен стечај, до 27 август 2023 година, остварени се 10,3 милиони евра приходи и 6,7 милиони евра загуба.
.webp){kind=icon}
