Сопственикот на платформата „Онлифанс“ (OnlyFans), Леонид Радвински, инкасирал вкупно 701 милион долари дивиденда во изминатава година, што претставува рекорден износ за 2024 година, покажуваат финансиските податоци објавени од матичната компанија ФИ (Fenix International Ltd).
Оваа исплата доаѓа во момент кога компанијата разгледува можности за продажба, со потенцијална вредност проценета на 8 милијарди долари, според извори на „Блумберг“.
„Онлифанс“, платформа која им овозможува на креаторите да продаваат содржини директно на обожавателите, зема 20 отсто провизија од секоја трансакција, вклучувајќи видеа, фотографии и разговори. Популарноста на страницата нагло се зголеми за време на пандемијата на Ковид-19, особено меѓу сексуалните работници и јавните личности. Иако голем дел од содржината е експлицитна, на платформата се присутни и креатори од други области, како фитнес и кулинарство.
Според податоците, Радвински — кој е единствен сопственик на ФИ — добил 497 милиони долари во редовни дивиденди, како и дополнителни 204 милиони долари исплатени во пет транши. Од 2021 година досега, тој има инкасирано вкупно околу 1,8 милијарди долари од платформата.
Во финансиската година која завршила на 30 ноември 2024, преку „Онлифанс“ биле процесирани 7,2 милијарди долари, што е зголемување од 6,6 милијарди во претходната година. Добивката пред оданочување достигнала 684 милиони долари, со раст од 4%. Бројот на креаторски профили пораснал на 4,6 милиони, додека бројот на обожавателски сметки скокнал за 24%, достигнувајќи 377,5 милиони.
И покрај овој огромен обем, компанијата брои само 46 вработени, од кои еден е директор. За плати, придонеси и бонуси биле исплатени 45,4 милиони долари, што е во просек речиси 1 милион по вработен, а највисоко платениот директор добил 9,7 милиони долари.
Инаку, Радвински, роден во украинскиот град Одеса, денес живее во Флорида. Тој купи мнозински удел во „Онлифанс“ во 2018 година од основачите, татко и син од Британија, Гај и Тим Стокли. На својата лична веб-страница Радвински наведува дека има цел еден ден да се приклучи на иницијативата ГП (Giving Pledge), со која богатите се обврзуваат да го донираат поголемиот дел од своето богатство.
.webp){kind=icon}
Во моментов нема коментари за веста. Биди прв да коментира...