„Ново“ повторно ги намали прогнозите, новиот директор се соочува со забавен раст

„Ново Нордиск“ (Novo Nordisk A/S) по четврти пат годинава ги намали своите прогнози поради послабата продажба на лековите „вегови“ (Wegovy) и „оземпик“ (Ozempic), што ја нагласува итноста со која се соочува новиот извршен директор.

Приходите ќе пораснат најмногу за 11 отсто годинава, додека оперативната добивка ќе се зголеми најмногу за 7 отсто, покажуваат податоците на данската фармацевтска компанија објавени во средата. Намалувањето на прогнозата доаѓа заедно со разочарувачките резултати за третиот квартал.

„Ново“ се соочува со зголемената конкуренција од „Ели Лили“ (Eli Lilly & Co.) на брзорастечкиот пазар на лекови против дебелина. Новиот извршен директор Мајк Доусдар презема агресивни чекори – отпушта 11 отсто од вработените и дава нова понуда вредна 10 милијарди долари за да ја преземе стартап-компанијата за третман на дебелина „Метсера“ (Metsera Inc.) од „Фајзер“ (Pfizer Inc.).

„Лили“ го засилува водството над „Ново“, при што продажните резултати на големите странски пазари почнуваат да го следат трендот на американскиот пазар, наведоа аналитичарите на „Морган Стенли“ (Morgan Stanley) пред објавата. Американската компанија минатата недела ги зголеми своите прогнози и ги надмина очекувањата за продажба со резултатите за третиот квартал.

Иако „Ново“ беше пионер на пазарот на лекови против дебелина со „оземпик“ и „вегови“, нејзиниот успех почна да се менува минатата година, кога новата експериментална инјекција не ги постигна резултатите за слабеење што компанијата ги ветуваше во клиничкото испитување. Данската компанија сега дел од своите надежи за раст насочува кон таблетна верзија на „вегови“. Акциите на „Ново“ паднаа за околу половина оваа година поради загриженоста за конкурентноста на производителот.

Bloomberg

И „Ново“ и „Фајзер“ ги зголемија своите понуди за „Метсера“. Новата понуда на „Ново“ ја вреднува тригодишната компанија, која сè уште нема лекови на пазарот, на околу 10 милијарди долари, со што го поништи претходниот договор на „Фајзер“ за купување на стартапот. Управниот одбор на „Метсера“ ја оцени понудата на „Ново“ како подобра зделка. „Фајзер“ одговори со сопствена, подобрена понуда од 8,1 милијарди долари, додека двете компании продолжуваат со судската битка.

Новите прогнози за профит и продажба се послаби во однос на претходните очекувања – приходите сега се предвидува да пораснат најмногу за 11 отсто, а добивката до 7 отсто, во споредба со порано предвиден раст до 14 односно 10 отсто. На почетокот од годината горните граници изнесуваа 24 и 27 отсто.

Профитот во минатиот квартал падна на 23,7 милијарди круни (3,6 милијарди долари), што е под процените на аналитичарите. И продажбата беше пониска од очекуваното, а растот беше најбавен од првиот квартал во 2021 година, пред американското лансирање на „вегови“, покажуваат податоците на „Блумберг“.