Акциите на „Енвидија“ паѓаат по најавите дека „Гугл“ подготвува нов предизвик со ВИ-чиповите

Акциите на „Енвидија“ (Nvidia Corp.) паднаа по извештајот дека „Мета“ (Meta Platforms Inc.) води разговори да вложи милијарди за ВИ-чиповите на „Гугл“ (Google), што сугерира дека интернет-гигантот напредува во обидите да му конкурира на најпродаваниот ВИ-акцелератор во индустријата.

„Мета“ е во преговори да ги користи чиповите на „Гугл“ познати како тензорски процесорски единици -ТПЕ (TPU) – во своите дата-центри во 2027 година, објави „Информејшн“ (The Information), повикувајќи се на анонимен извор запознаен со преговорите. Освен тоа, „Мета“ веќе од следната година може да изнајмува чипови и преку облачната дивизија на „Гугл“, наведува медиумот.

Таков договор би помогнал ТПЕ-чиповите да се етаблираат како алтернатива на чиповите на „Енвидија“, златниот стандард за големите технолошки компании и стартапите – од „Мета“ до „Опен еј-ај“ (OpenAI) – што имаат потреба од огромна пресметковна моќ за развој и функционирање на платформите за вештачка интелигенција.

Акциите на „Енвидија“ паднаа за до 2,7 проценти во тргувањето по затворањето на берзата. Акцииите, пак, на „Алфабет“ (Alphabet Inc.), сопственикот на „Гугл“, пораснаа за 2,7 проценти, продолжувајќи го неодамнешниот раст поттикнат од оптимизмот околу најновата верзија на нејзиниот ВИ-модел Џемини.

Bloomberg

„Гугл“ претходно склучи договор да му испорача до еден милион од своите чипови на „Антропик“ (Anthropic PBC), што го насочи вниманието кон потенцијалните долгорочни предизвици за доминантната пазарна позиција на „Енвидија“.

По објавата на договорот со „Антропик“, аналитичарот на „Сипорт“ (Seaport Research Partners) Џеј Голдберг го нарече тоа „навистина силна потврда“ за ТПЕ-чиповите.

„Многумина веќе размислуваа за тоа, а сега веројатно размислуваат уште повеќе“, додаде тој.

Претставниците на „Мета“ одбија да коментираат, додека „Гугл“ не одговори веднаш на барањата за реакција.

Што вели „Блумберг интелиџенс“

Веројатната употреба на ТПЕ-чиповите на „Гугл“ од страна на „Мета“, кои веќе ги користи и „Антропик“, покажува дека провајдерите на големи јазични модели најверојатно ќе го користат „Гугл“ како секундарен доставувач на акцелераторски чипови во блиска иднина.

Капиталните расходи на „Мета“ од најмалку 100 милијарди долари за 2026 година укажуваат дека компанијата следната година ќе издвојува најмалку 40–50 милијарди за капацитети на чипови, пресметува „Блумберг интелиџенс“. Потрошувачката и растот на нарачките на „Гугл клауд“ може да се забрзаат во однос на другите големи провајдери и новите конкуренти поради побарувачката од корпоративни клиенти што сакаат да ги користат TПЕ-чиповите и ВИ-моделите Џемини преку „Гугл клауд“.

Акциите на азиските компании поврзани со „Алфабет“ нагло пораснаа во раното тргување во Азија. Во Јужна Кореја, „Исупетасис“ (IsuPetasys Co.), која испорачува повеќеслојни плочи за „Алфабет“, скокна за 18 проценти и достигна нов дневен рекорд. Во Тајван, акциите на „Медијатек“ (MediaTek Inc.) пораснаа за речиси 5 проценти.

Договор со „Мета“ – една од компаниите што глобално трошат најмногу за дата-центри и развој на ВИ – би бил значајна победа за „Гугл“. Но многу ќе зависи од тоа дали тензорските чипови можат да ги покажат енергетската ефикасност и пресметковната моќ што се потребни за да станат одржлива долгорочна опција.

Тензорскиот чип – развиен пред повеќе од една деценија специјално за задачи поврзани со вештачка интелигенција – добива сè поголем замав и надвор од матичната компанија како алтернативен начин за тренирање и извршување сложени ВИ-модели. Неговата привлечност расте во период кога компаниите низ светот стравуваат од претерана зависност од „Енвидија“, на пазар каде што дури и АМД (Advanced Micro Devices Inc.) заостанува далеку зад неа.

Графичките процесорски единици, или ГПЕ-чиповите, сегмент во кој доминира „Енвидија“, првично беа создадени за забрзување на графиката – главно кај видеоигрите и визуелните ефекти, но се покажаа исклучително погодни за надградба на ВИ-модели бидејќи можат да обработуваат огромни количества податоци и пресметки.

TПЕ-чиповите, пак, се вид на специјализирани микропроцесори познати како апликациски специфични интегрирани кола, дизајнирани за конкретна техничка намена.

Тензорските чипови дополнително беа приспособени како акцелератори за задачи во ВИ и машинско учење во сопствените апликации на „Гугл“. Бидејќи „Гугл“ и неговата единица „Дипмајнд“ развиваат напредни ВИ-модели како Џемини, компанијата успеа да ги пренесе научените лекции од тие тимови кај дизајнерите на чипови. Истовремено, можноста за приспособување на чиповите им користи и на самите ВИ-тимови.