Една од најголемите македонски градежни компании ГД „Гранит“ АД Скопје во првите три месеци од годинава оствари консолидирана добивка во износ од 387.000 денари, што е неколкукратно намалување во однос на истиот период минатата година кога добивката изнесувала 3,4 милиони денари, покажува консолидираниот неревидиран биланс на успех на компанијата објавен преку Македонската берза.
Компанијата соопшти дека вкупната сеопфатна добивка во овој период изнесува 119.772.000 денари.
„Таа е поголема од добивката пред се‘ поради останатата сеопфатна добивка во износ од 119.385.000 денари која произлегува како резултат на евидентирана нереализирана добивка од зголемување на пазарната вредност на портфолиото акции кои ги поседува друштвото во првиот квартал на 2022 година“, објаснија од „Гранит“.
Остварените консолидирани вкупни приходи во периодот јануари - март 2022 година изнесуваат 827.551.000 денари и во споредба со остварените во истиот период 2021 година бележат зголемување за 14 отсто. Приходите од продажба изнесуваат 775.940.000 денари и во споредба со остварените во истиот период 2021 година бележат зголемување за 10 отсто. Финансиските приходи изнесуваат 1.540.000 денари и во споредба со остварените во истиот период 2021 година бележат намaлување за 38 отсто.
Остварените консолидирани вкупни расходи во периодот јануари - март 2022 година се во износ од 827.164.000 денари, споредено со истиот период 2021 година бележат зголемување за 14 отсто.
„Во рамките на оперативните расходи, трошоците за материјали и суровини бележат зголемување за 23 отсто во однос на минатата година, пред се како резултат на зголемување на пазарните цени на одредени клучни материјали за изградба како и недостигот и доцнењата во нивна испорака. Трошоците за вработени се на исто ниво како и минатата година, додека останатите трошоци од работењето се намалени за 32 отсто. Трошоците за услуги се зголемени во однос на претходната година за 23 отсто како резултат на зголемениот износ на трошоци за подизведувачи кои директно зависи од обемот на извршени работи, но и поради зголемените цени“, информираат од компанијата.
Вкупните инвестиции во основни средства во периодот јануари - март 2022 година изнесуваат 33,8 милиони денари, од кои најголем дел или 29,9 милиони денари се во опрема и механизација.
Консолидираните финансиски извештаи за периодот јануари–март 2022 година ги опфаќаат работењето на следните друштва: ГД „Гранит“ АД Скопје – матично друштво и друштвата „Хотел Гранит“ ДООЕЛ Охрид, „Карваш“ Скопје, „Гранмак Виена“, „Гранмак експорт-импорт“ Германија, ГД „Гранит“ Бања Лука и ГД „Гранит“ Подружница Бања Лука, коишто се во стопроцентна сопственост на „Гранит“ АД Скопје.
Од групацијата очекуваат пандемијата на Ковид-19 се‘ уште да има влијание врз светската економија, а следствено на тоа и врз македонската економија во наредниот период. Влијаније се очекуваат и од постоечката криза во Украина со Русија и енергетска криза и тоа манифестирани преку значајното зголемување на цените на главните енергенси (струја, гас, нафта).
„Влијанијата ќе имаат ефект посебно врз зголемување на цените на одредени суровини и материјали и на енергијата, а преку тоа и врз крајните цени на многу производи. Друштвото континуирано ги следи движењата во националаната, регионаланата и глобалната економија со цел да се добијат информации за полесно одлучување. Секторот градежништво во времето на текот на пандемијата продолжи да функционира, но во изменети и новонастанати околности. Исто така, кризата во Украина како и зголемување на цените на енергенсите и континуираниот пораст на цените на суровините, порастот на минималната плата, а со тоа и пораст на сите останати плати, ќе имаат влијание на пораст на трошоците на главните инпути во наредниот период“, објаснуваат од „Гранит“.
Оттаму укажуваат дека ги преземаат сите неопходни активности за прилагодување на состојбата со здравствената криза, како и новонастаната енергетска криза со порастот на цените на енергенсите и суровините и ќе настојуваат да ги завршат сите предвидени активности согласно плановите за градење со инвеститорите, при што и цените на услугите и производите на друштвото ќе се адаптираат на тековните цени.
.webp){kind=icon}
