Клучниот производител на чипови за „Енвидија“, „ТСМЦ“, со приходи над очекувањата

Приходите на „ТСМЦ“ (Taiwan Semiconductor Manufacturing Co.) ги надминаа проценките, зајакнувајќи ги надежите за континуирана глобална потрошувачка за вештачка интелигенција во 2026 година, и покрај загриженоста за можен индустриски балон.

Клучниот производител на чипови за „Енвидија“ (Nvidia Corp.) пријави приближно 20 отсто раст на приходите во кварталот што заврши во декември, на 1,05 билиони тајвански долари (33,1 милијарда долари), врз основа на пресметки од месечните податоци. Тоа е над просечната проекција од 1,02 билиони тајвански долари.

Поттикнати од побарувачката за чипови за дата-центри, раководителите на „Енвидија“ оваа недела изразија оптимизам за посветла перспектива на приходите, спротивставувајќи се на стравувањата дека изградбата на инфраструктурата оди побрзо од реалната примена на вештачката интелигенција. „ТСМЦ“, како голем производител на чипови и за „Епл“ (Apple Inc.), можеби доби дополнителен поттик и од силната продажба на „Ајфон 17“, лансиран во септември.

„ТСМЦ“ е меѓу најголемите добитници од бумот на вештачката интелигенција по појавата на „Чет ГПТ“, благодарение на својата централна улога во производството на напредни ВИ-акцелератори. Глобални технолошки гиганти, од „Мајкрософт“ (Microsoft Corp.) до „Мета платформс“ (Meta Platforms Inc.), колективно вложуваат повеќе од 1 билион долари во проекти за дата-центри за да профитираат од растечката примена на ВИ, но инвеститорите стравуваат дека планираните капацитети ќе ја надминат реалната употреба.

Продажбата на „ТСМЦ“ повторно порасна во година на огромна побарувачка за ВИ
Водечкиот светски производител на чипови ги надмина сопствените насоки и пазарните проценки

Bloomberg

Меѓусебно поврзаната природа на многу од тие аранжмани за дата-центри, во кои инвестициите и трошоците се движат напред-назад меѓу „Опен еј-ај“ (OpenAI) и неколку јавно тргувани технолошки гиганти, исто така ја загрижува Волстрит.

„ТСМЦ“ ќе ги објави целосните квартални резултати следната недела, заедно со прогнозата за капиталните трошоци за 2026 година. Минатата година, компанијата имаше корист од итни нарачки, откако клиентите создаваа залихи од чипови пред да стапат на сила американските царини. Компанијата издвои од 40 до 42 милијарди долари за проширување и надградби во 2025 година.

Повеќе брокерски куќи, меѓу кои и „ЏП Морганс“ (JPMorgan Chase), ги зголемија своите целни цени за „ТСМЦ“ од почетокот на годината, повикувајќи се на очекувања за силен раст на приходите и подобрување на профитабилноста.

Bloomberg